நீட் தேர்வில் பாஸ் ஆனாலே சீட் கிடைத்துவிடும், ஏழை, பணக்காரர் என்று வித்தியாசம் இல்லாமல் எல்லோருக்கும் நீதி கிடைக்கும். மெடிக்கல் சீட்டை விற்பனை செய்யும் கொள்ளை இனி நடக்காது என்றெல்லாம் சொல்லித் தான் நீட் தேர்வை அறிமுகம் செய்தார்கள்.
நீட் தேர்வில் நடந்த அநியாயத்துக்கு உயிர் கொடுத்த அனிதாவின் மரணத்தையொட்டி, தமிழகத்திற்கு விலக்கு வேண்டும் என்று தொடர்ந்து தி.மு.க. குரல் கொடுத்துவருகிறது. நீட் தேர்வை ஒழிக்கும் ரகசியம் தெரியும் என்று சொல்லி ஆட்சிக்கும் வந்தார்கள். ஆனால், நீட் தேர்வை ஒழிக்க தி.மு.க.வால் முடியவில்லை.
அதேநேரம், நீட் எத்தனை அயோக்கியத்தனமான தேர்வு என்று தினம் ஒரு முறைகேடு வெளியாகி வருகிறது. தமிழகம் போன்ற மாநிலங்களில் தாலியைக் கூட கழட்டிவிட்டு தேர்வு எழுதச் சொல்லும் சூழலில் வெளிநாட்டில், வெளி மாநிலங்களில் வசிப்பவர்கள் ரொம்பவே ஜாலியாக தேர்வு எழுதுகிறார்கள்.
வினாத்தாள் கசிவது சகஜமாக நடக்கிறது. ஒரே கோச்சிங் சென்டரில் படித்தவர்கள் அதிக மதிப்பெண் வாங்கி வெற்றி பெறுகிறார்கள். இதையெல்லாம் தோண்டிப் பார்த்தால் ஊழல் மேல் ஊழல் நடந்திருப்பது தெரியவருகிறது. லட்சங்களும் கோடிகளும் வைத்திருக்கும் நபர்கள் மட்டுமே நீட் தேர்வில் வெல்ல முடியும் என்பது தெளிவாகத் தெரிகிறது.
நீதிமன்றம் இந்த தேர்வு குறித்து சந்தேகம், கேள்வி எழுப்பிய பிறகும் நீட் தேர்வு மிகவும் பாதுகாப்பானது, சரியானது என்று மத்திய அரசு தொடர்ந்து கூறிவருகிறது. நீட் தேர்வினால் பாதிக்கப்படும் அப்பாவிகளை கண்டுகொள்ளாமல் அதிகாரிகளையும், மாட்டிக்கொண்ட தேர்வாளர்களையும் காப்பாற்றவே மத்திய அரசு முயற்சி செய்து வருகிறது.
மோடியின் ஊழல் ஒழிப்பு நீட் தேர்வில் சந்தி சிரிக்கிறது.
