தி.மு.க.வின் அமைப்புச்செயலாளர் ஆர்.எஸ்.பாரதிக்கு வாய்க்கொழுப்பு அதிகம் என்பது தெரிந்த சமாச்சாரம் தான். நாய்க்கறி உண்பவர்களே நாகலாந்து மக்கள்..!, ஆணாய் பிறந்து வீணாய் போனவர்கள் காங்கிரஸ்காரர்கள்..!, காமராஜர்க்கு கல்லறை கட்டியதே நாங்க தான்..!, தமிழக ஊடகத்துறையில் ரெட் லைட் பகுதிகளில் வேலை பார்க்கலாம் ..!, இன்று தமிழகத்தில் மருத்துவர்களா இருப்பவர்கள் திமுக போட்ட பிச்சையினால் தான்..! பட்டியலின மக்கள் நீதிபதிகளாக இருப்பது திராவிடம் போட்ட பிச்சை..! என்றெல்லாம் பேசி தி.மு.க.வுக்கு கெட்ட பெயர் வாங்கிக் கொடுத்தவர்.
அவர் மீண்டும், “குலப்பெருமையால், கோத்திரப்பெருமையால் நாம் டாக்டராகவோ, வக்கீலாகவோ ஆகிவிடவில்லை. நாங்களெல்லாம் படித்திருக்கிறோம் என்றால், இது திராவிட இயக்கம் போட்ட பிச்சை. நாங்கள் படிக்கும்போது, யாரேனும் பி.ஏ பட்டம் பெற்றால், உடனே பெயருக்கு பின்னால் பி.ஏ., எனக் குறிப்பிட்டு போர்டு போட்டுக்கொள்வார்கள். இப்போது நாய்கூட பி.ஏ பட்டம் வாங்குகிறது. ஊரில் அத்தனைப் பேரும் ஏதேனும் ஒரு பட்டத்தை படித்து பெற்றிருக்கிறார்கள். இந்த வளர்ச்சியை அழிக்கதான் இந்த நீட் தேர்வு வந்திருக்கிறது’ என்று பேசியிருக்கிறார்.
இவர் வேண்டுமென்றே இப்படி பேசி, ஒரு பிரச்னையை திசை திருப்புகிறார் என்பது நன்றாகவே தெரிகிறது. கள்ளக்குறிச்சி கள்ளச்சாராய விவகாரத்தில் தி.மு.க. மீது தொடர்ந்து எதிர்க் கட்சியினர் குற்றம் சாட்டி வருகிறார்கள். இந்த நிலையில் மீண்டும் தமிழகத்தில் இரண்டு இடங்களில் கள்ளச்சாராய மரணம் நடந்துள்ளது. இதை திசை திருப்பவே இப்படி பேசுகிறார், உடனே அத்தனை எதிர்க் கட்சியினரும் பாரதி மீது பாய்ந்து பிராண்டுகிறார்கள்.
அறிவாலயம் போட்ட பிச்சைக்கு ஆர்.எஸ்.பாரதி சிறப்பாக வேலை செய்திருக்கிறார். இந்த பேச்சு கஷ்டப்பட்டு படிக்கும் மாணவர்களை அதிர வைத்துள்ளது. இவரது பேச்சுக்கு நீதிமன்றம் மீது நடவடிக்கை எடுக்க வேண்டும். இல்லையென்றால் மீண்டும் மீண்டும் இப்படி பேசிக்கொண்டே தான் இருப்பார்.
