தமிழ்நாட்டில் மட்டும் விலைவாசி உயர்ந்திருப்பது போன்று எதிர்க்கட்சியினர்
தொடர்ந்து குற்றம் சாட்டி வருகிறார்கள். அரிசி வரத்து குறைந்திருப்பதும், அரிசியை எதிர்க்கட்சி
வியாபாரிகள் பதுக்கி வைத்து விலையேற்றத்தை உருவாக்குவதாகவும் உணவுத்துறை அமைச்சர் குற்றம்
சாட்டினார்.
அதேநேரம், சாதாரண பொதுமக்களுக்குப்
பாதிப்பு வந்துவிடக் கூடாது என்பதற்காக அரிசியை 30 ரூபாய்க்கு விற்பனை செய்வதற்கு அரசு
நடவடிக்கை எடுத்திருக்கிறது. விஜய்யின் இந்த நடவடிக்கை மக்களை குஷிப்படுத்தியிருக்கிறது.
இதுகுறித்து தவெகவின் ஐ.டி. விங், ‘’அவசர அவசரமாக விலைவாசி உயர்வு
பற்றி அரைவேக்காட்டுப் பதிவு போட்ட டம்மி டாடி அவர்களே! காலநிலை மாற்றத்தால் உற்பத்தி
குறைந்துள்ளதால், ஆந்திரா மற்றும் கர்நாடகாவிலிருந்து கொள்முதல் செய்யப்படும் சன்னரக
அரிசியின் விலை உயர்ந்துள்ளது.
இந்த விவகாரத்தை உணவு மற்றும் நுகர்வோர் பாதுகாப்புத் துறை அமைச்சர்
உடனடியாக மாண்புமிகு முதலமைச்சரின் கவனத்திற்குக் கொண்டு சென்றுள்ளார். முதலமைச்சரின்
ஆலோசனையின்படி, அரிசி, பருப்பு உள்ளிட்ட அத்தியாவசியப் பொருட்களை மாநிலம் முழுவதும்
உள்ள அமுதம் அங்காடிகளில் குறைந்த விலையில் வழங்க நடவடிக்கை எடுக்கப்பட்டுள்ளது.
அரிசி விலை உயர்வைக் கட்டுப்படுத்த, ஒரு லட்சம் மெட்ரிக் டன் அரிசியை
(தமிழ்நாட்டில் உற்பத்தி செய்யப்படும் அரிசி) உடனடியாகக் கொள்முதல் செய்ய உத்தரவிடப்பட்டு,
கொள்முதல் பணிகள் நடைபெற்று வருகின்றன. இதில், நாளை 25,000 மெட்ரிக் டன் அரிசியை அனைத்து
அமுதம் அங்காடிகளுக்கும் அனுப்பி, கிலோ ரூ.30-க்கு விற்பனை செய்ய ஏற்பாடு செய்யப்பட்டுள்ளது.
விலையேற்றத்திற்கு உற்பத்திக் குறைவு ஒரு காரணமென்றால், அரசியல்
காழ்ப்புணர்வுடன் செயல்படும் சில அரிசி ஆலை உரிமையாளர்கள் அரிசியைப் பதுக்கி வைப்பதும்
முக்கியக் காரணம். இந்த முறைகேடுகளைக் களையவும் நடவடிக்கை எடுக்கப்பட்டு வருகிறது.
தினத்தந்தி நாளிதழைச் சுட்டிக்காட்டிய டம்மி டாடி அவர்களே, அதே செய்தியின் தலைப்பில்
இடம்பெற்ற “எல் நினோ தாக்கத்தால் உற்பத்தி குறைவு” என்ற வரி கண்ணில் படவில்லையா? அல்லது
அரசியல் காழ்ப்புணர்வு கண்ணை மறைத்துவிட்டதா? செய்தியை முழுமையாகப் படித்திருந்தால்
இந்த அரைவேக்காட்டுப் பதிவைப் போட்டிருக்க மாட்டீர்கள். அவசரத்தில் அரசியல் செய்ய நினைத்து,
உங்கள் சொந்த ஆதாரத்திலேயே அம்பலப்பட்டு நிற்கிறீர்கள்! மண்டை மேல இருக்கிற கொண்டையை
மறந்துட்டீங்க ஸ்வீட் அங்கிள்’’ என்று அட்டகாச பதிலடி கொடுத்திருக்கிறது.
அமுதம் அங்காடியில் ஒரு நபருக்கு 2 கிலோ மட்டும் கொடுக்கப்படுவதை
மாற்றி, குடும்பத்துக்கு 10 கிலோ கொடுத்தால் நல்லது என்று மக்கள் கோரிக்கை வைக்கிறார்.
விஜய் அரசு பரிசீலனை செய்யட்டும்.
