ஜோதிடர் நியமனத்தில் சர்ச்சை எழுந்ததும்
அதனை ரத்து செய்தார் முதல்வர் விஜய். இப்போது அவரது அரசியல் ஆலோசகர்களாக செயல்பட்டுவந்த
ஜான் ஆரோக்கியசாமி மற்றும் விஷ்ணு ரெட்டிக்கும் புதிய பதவிகள் கொடுத்து அங்கீகரித்திருக்கிறார்.
விஜய்யின் அரசியல் ஆலோசகராக பிரபல தேர்தல்
வியூக வகுப்பாளர் ஜான் ஆரோக்கியசாமி நியமிக்கப்பட்டுள்ளார். கடந்த காலங்களில் பாமக
போன்ற தமிழகத்தின் முக்கியக் கட்சிகளின் மெகா பிரச்சார உத்திகளுக்குப் பின்னால் இவருடைய
பங்களிப்பு மிக முக்கியமானதாக இருந்தது. தற்போது முதலமைச்சர் விஜய்யின் அரசியல் ஆலோசகராகப்
பொறுப்பேற்றுள்ள ஜான் ஆரோக்கியசாமி, தவெக அரசின் அடுத்தகட்ட அரசியல் நகர்வுகள், கூட்டணிக்
கட்சிகளைச் சீராகக் கையாளுதல், மற்றும் சட்டமன்றத்தில் எதிர்கட்சிகளின் சவால்களை அரசியல்
ரீதியாக எதிர்கொள்வதற்கான உத்திகளை வடிவமைப்பதில் மிக முக்கியப் பங்காற்ற உள்ளார்.
விஜய்யின் நெருங்கிய நண்பரும், பிரபல தொழிலதிபருமான
விஷ்ணு ரெட்டி, கட்சியின் சமீபத்திய அரசியல் நகர்வுகளில் மிக முக்கியப் பங்காற்றி வருகிறார்.
தவெக-வின் முக்கிய அரசியல் வியூகங்கள் மற்றும் களப்பணிகளை வகுப்பதில், குறிப்பாக கட்சியின்
பிரம்மாண்ட சமூக ஊடகக் கட்டமைப்பை வழிநடத்துவதில் இவர் பின்னணியாக இருந்து செயல்பட்டதாக
நம்பத்தகுந்த வட்டாரங்கள் தெரிவிக்கின்றன. கல்லூரி காலத்தில் இருந்தே இவர்கள் இருவரும்
நண்பர்கள். அண்மையில், ஆளுநரைச் சந்திக்கச் சென்ற தவெக தலைவர்கள் அடங்கிய முக்கியக்
குழுவில் விஷ்ணு ரெட்டியும் இடம்பெற்றிருந்தது, கட்சியின் உயர்மட்ட ஆலோசனைக் குழுவிலும்
அவரது செல்வாக்கையும், முக்கியத்துவத்தையும் உறுதிப்படுத்தும் வகையில் அமைந்துள்ளது.
எனவே விஷ்ணு ரெட்டிக்கு பொது நிகழ்வுகள்
ஆலோசகர் பதவி கொடுக்கப்பட்டுள்ளது. முதல்வர் விஜய்யின் அன்றாடப் பொது நிகழ்ச்சிகள்,
அரசு விழாக்கள் மற்றும் மக்களைச் சந்திக்கும் பயணத் திட்டங்களை மிகவும் திட்டமிட்டு,
நேர்த்தியாகவும் துல்லியமாகவும் ஒருங்கிணைக்கும் ஒரு மிக முக்கியப் பொறுப்பு விஷ்ணு
ரெட்டி அவர்களிடம் ஒப்படைக்கப்பட்டு உள்ளது.
அரசு நிர்வாகத்தில் முதலமைச்சரின் நேரடிப்
பங்களிப்பை முறைப்படுத்துவது, மக்கள் குறைகளைக் கேட்கும் தளங்களை உருவாக்குவது மற்றும்
பொது நிகழ்வுகளின் போது பின்பற்ற வேண்டிய பாதுகாப்பு நெறிமுறைகள் போன்ற அனைத்தையும்
முன்னின்று நடத்தும் பொறுப்புகள் இவருக்கு வழங்கப்பட்டுள்ளன. மேலும், முதலமைச்சரின்
நற்பெயர் மற்றும் தமிழக அரசின் முக்கியத் திட்டங்கள் எந்தவித தொய்வும் இன்றி மக்களிடம்
நேரடியாகச் சென்றடைவதைக் கண்காணிக்கும் பிரதானப் பணியும் இவருடைய ஆலோசனைக் குழுவின்
கீழ் வரும் என்று தலைமைச் செயலக வட்டாரங்கள் தெரிவிக்கின்றன.
விஜய் தன்னுடைய ஆட்கள் யார் என்பதை இப்போது
வெளிப்படையாகக் காட்டியிருக்கிறார். இந்த மூவ் வெற்றி அடையட்டும்.
