கரூர் நெரிசல் மரணங்களுக்குப் பிறகு தவெக பொதுக்குழுக் கூட்டம் நடைபெற்றது. இந்த கூட்டத்தில் நெரிசலில் உயிர் இழந்தவர்கள் குடும்பத்துக்கு ஆறுதல் சொல்லும் வகையில் விஜய்யின் பேச்சு உணர்வுபூர்வமாக இருக்கும் என்று எதிர்பார்க்கப்பட்டது. ஆனால், இந்தக் கூட்டம் முழுக்க முழுக்க ஸ்டாலின் எதிர்ப்புக் கூட்டமாகவே மாறிவிட்டது.
ஆனந்த் தொடங்கி ஆதவ் அர்ஜுனா வரை ஸ்டாலினை பேட்டை ரவுடி போன்று தொட்டுப் பாருடா எங்கள் தளபதியை என்ற ரீதியில் பேசினார்கள்.
விஜய்யாவது மரணமடைந்த உயிர்களுக்கு ஆதரவாகப் பேசுவார் என்று பார்த்தால், அவரும் ஸ்டாலினை மிரட்டும் வகையிலே பேசினார். விஜய் பேசுகையில், ‘’முதல்வர் நமக்கு எதிராகப் பேசியதில் எவ்வளவு வன்மத்தைக் கக்கியுள்ளார் என்பதை தமிழக மக்கள் உணர்ந்திருப்பார்கள். கரூருடன் சேர்ந்து ஐந்தாறு மாவட்டம் சென்றோம், அங்கெல்லாம் கடைசி நேரம் வரை இடம் ஒதுக்குவார்களா? மாட்டார்களா? என்று இழுத்தடிப்பார்கள். மக்கள் நெருக்கடியோடு நின்று பார்க்கும் வகையில்தான் இடத்தை ஒதுக்கினார்கள்.
திமுகவின் தில்லுமுல்லுகளை தாங்கிப்பிடிக்க முடியாமல் உச்சநீதிமன்றத்தில் திக்கித் திணறி நின்றது முதல்வருக்கு மறந்துவிட்டதா? அவசர அவசரமாக தனிநபர் ஆணையம் அமைத்து, அதனை அவமதிக்கும் வகையில் அதிகாரிகள் செய்தியாளர்கள் சந்திப்புகள் நடந்தது. ஏன் என்று மக்கள் கேள்வி கேட்க ஆரம்பித்தனர், இதை தமிழக முதல்வர் மறந்துவிட்டாரா? 50 வருட பொதுவாழ்க்கையில் இருக்கும் முதல்வர் சொன்னது வடிகட்டிய பொய்’’ என்று கன்னாபின்னாவென்று தாக்குதல் நடத்தியிருக்கிறார்.
திமுகவினர் சமூகவலைதளத்தில் விஜய் பேச்சுக்கு கடுமையாக எதிர்ப்பு தெரிவித்துவந்தாலும், ஸ்டாலின் விஜய் பற்றி வாயைத் திறக்கவே இல்லை. அப்படி பேசினால் விஜய் சொல்வது போன்று திமுகவுக்கும் தவெகவுக்கும்தான் போட்டி என்பது போன்று நிலைமை மாறிவிடலாம் என்று நினைக்கிறாரோ என்னவோ..?
அதேநேரம், எந்த நேரத்திலும் அதிமுக கூட்டணியில் இணைந்து மாபெரும் வெற்றி பெறும் வாய்ப்பு இருப்பதாலே ஸ்டாலின் மீது விஜய் இத்தனை காட்டமாகத் தாக்குதல் நடத்துவதாகவும் சொல்கிறார்கள். தேர்தல் ஆட்டம் சூடுபிடிக்கிறது.
