பருவ மழை தொடங்கப்போகிறது, இந்த ஆண்டு குறுவை நெல் விளைச்சல் அமோகம் என்பதும் திமுக அரசுக்கு நன்றாகத் தெரியும். ஆனாலும் நெல் கொள்முதல் செய்வதற்கும், கொள்முதல் செய்த நெல்லை பாதுகாக்கவும், அந்த நெல்லை அரவைக்கு அனுப்பவும் எந்த முயற்சியும் எடுக்காமல் திமுக அசட்டை காட்டியதால் விவசாயிகள் பெரும் இழப்பை சந்தித்திருக்கிறார்கள்.
கொள்முதல் நடக்கும் என்று ரோடு முழுக்க விவசாயிகள் கொட்டிவைத்திருந்த நெல்மணிகள் எல்லாமே முளைத்துவிட்டன. வயல் வெளியில் பயிர்கள் மூழ்கிவிட்டன. கொள்முதல் நிலையங்கள் திறக்காத காரணத்தால் அறுவடை செய்ய முடியாமல் பயிரிலே அழிக்கவேண்டிய அவலத்துக்கு விவசாயிகள் ஆளாகியுள்ளனர்.
இந்த நிலையில், வெளிமாவட்டங்களில் உள்ள அரிசி அரவை ஆலைகளுக்கு ரயிலில் ஏற்றி அனுப்புவதற்காக கும்பகோணம் தொடர்வண்டி நிலையத்திற்கு சரக்குந்துகளில் கொண்டு வரப்பட்ட 36,000 நெல் மூட்டைகள் முளைத்து வீணாகிவிட்டன. இந்த நேரத்திலும் இதற்கெல்லாம் காரணம் மத்திய அரசு என்று காரணம் சொல்லி தப்பிக்கப் பார்க்கிறது திராவிட அரசு.
எல்லாவற்றுக்கும் மத்திய அரசுதான் காரணம் என்றால், மாநில அரசு என்ன செய்யப்போகிறது என்று விவசாயிகள் கேள்வி எழுப்புகிறார்கள். மது விற்பனை குறைந்தால், டாஸ்மாக் கடையில் குறை எழுந்தால் உடனடியாக சரி செய்யும் திமுக அரசுக்கு விவசாயிகள் என்றால் மட்டும் அலட்சியம் காட்டுவதே வேதனை.
விவசாயிகளின் கண்ணிர் திமுக அரசை அசைத்துவிடும்.
