கோவை விமான நிலையத்தின் பின்புறம் ஆண் நண்பருடன் பேசிக்கொண்டு
இருந்த கல்லூரி மாணவி பாலியல் பலாத்காரம் செய்யப்பட்ட சம்பவம் மிகப்பெரும் அதிர்ச்சியை
ஏற்படுத்தி உள்ளது.
நேற்று இரவு 11 மணியளவில் கோவை விமான நிலையத்தின் பின்புறம் உள்ள
பகுதியில் ஆண் நண்பருடன் கல்லூரி மாணவி ஒருவர் பேசிக்கொண்டு இருந்துள்ளார். அப்போது
அந்த வழியாக வந்த 3 இளைஞர்கள் அந்த இளைஞரை தாக்கிவிட்டு பெண்ணை தூக்கிச் சென்றுள்ளனர்.
தாக்குதலால் காயமடைந்த இளைஞர் இது தொடர்பாக காவல் நிலையத்தில் தகவல் தெரிவித்தார்.
புகாரைத் தொடர்ந்து மாணவியை தேடிய போலீஸார், அவரை நிர்வாணமான நிலையில்
மீட்டுள்ளனர். அவரை பாலியல் பலாத்காரம் செய்த 3 இளைஞர்கள் தப்பி ஓடியுள்ளனர். மாணவியும்,
தாக்குதலில் படுகாயம் அடைந்த இளைஞரும் மருத்துவமனையில்
சிகிச்சை பெற்று வருகின்றனர்.
இதுகுறித்து அண்ணாமலை, ‘’கோவை சர்வதேச விமான நிலையம் அருகில்,
நேற்று இரவு, நண்பருடன் பேசிக் கொண்டிருந்த சட்டக் கல்லூரி மாணவி, மூன்று சமூக விரோதிகளால்
கூட்டுப் பாலியல் வன்முறைக்குள்ளாக்கப்பட்ட செய்தி, மிகுந்த அதிர்ச்சி அளிக்கிறது.
மருத்துவமனையில் சிகிச்சை பெற்று வரும் மாணவி விரைந்து நலம் பெற வேண்டிக் கொள்கிறேன்.
தமிழகத்தில் திமுக ஆட்சிக்கு வந்த பின்னர், சமூக விரோதிகளுக்கு
சட்டத்தின் மீதோ, காவல்துறையின் மீதோ சிறிதும் பயமில்லை என்பதையே, பெண்களுக்கெதிரான
இது போன்ற தொடர் குற்றச் செயல்கள் காட்டுகின்றன. திமுக அமைச்சர்கள் முதல், காவல்துறையினர்
வரை, பாலியல் குற்றவாளிகளைப் பாதுகாக்கும் போக்கையே மேற்கொள்கின்றனர்.
பாலியல் குற்றங்களைத் தடுக்கவோ, பெண்களுக்கு பாதுகாப்பளிக்கவோ,
திமுக ஆட்சி தவறிவிட்டது. பொதுமக்களுக்கு பாதுகாப்பு வழங்கவோ, சட்டம் ஒழுங்கைக் காக்கவோ,
காவல்துறையினரைப் பயன்படுத்தாமல், திமுக அரசை விமர்சிப்பவர்களைக் கைது செய்ய மட்டுமே
பயன்படுத்துவதால், தமிழகம் இன்று இழிநிலையில் இருக்கிறது’’ என்று குற்றம் சாட்டியிருக்கிறார்.
