பஹ்ரைனில் நடைபெற்ற இளையோருக்கான ஆண் மற்றும் பெண் கபடி விளையாட்டுப்
பிரிவில் இந்திய அணி சார்பில் கார்த்திகா, அபினேஷ் ஆகியோர் பங்கேற்ற அணி தங்கப்பதக்கம்
வென்று சாதனை புரிந்தது. இவர்களுக்கு தலா 25 லட்சம் ரூபாய் ஊக்கத் தொகையை முதல்வர்
ஸ்டாலின் வழங்கினார்.
இந்த விவகாரத்தில் திருமாவளவன், ‘’தமிழ்நாடு அரசு இவ்விரு சாதனையாளர்களுக்கும்
ரூ. 25 இலட்சம் ஊக்கத்தொகை வழங்கிப் பாராட்டியிருப்பது மகிழ்ச்சியளிக்கிறது. எனினும்,
அவ்விருவருக்கும் தலா ஒரு கோடியாக உயர்த்தி வழங்கவேண்டும்’’ என்று கோரிக்கை வைத்திருக்கிறார்.
அதேபோன்று கண்ணகி நகர் கார்த்திகாவிற்கு ஒரு கோடி அல்ல 5 கோடி
தர வேண்டும் என்று பல்வேறு தரப்பினர் கோரிக்கை வைக்கத் தொடங்கியிருக்கிறார்கள். 25
லட்சம் கொடுத்தால் கார்த்திகாவின் வாழ்க்கைத் தரம் உயராது. அதையே இந்த அரசு விரும்புகிறது
என்று ஸ்டாலின் மீது புகார் வைக்கிறார்கள்.
இதற்கு திமுகவினர், ‘’ஆம்ஸ்ட்ராங் கொலையின் போது, திமுகவுக்கெதிராக
வெளிப்பட்ட அதே சாதி வெறியன்கள், இன்று கார்த்திகாவுக்காகவும் வெளிப்பட்டிருக்கின்றனர்,
தனி மனிதனாய் நாட்டுக்காக பதக்கம், கோப்பை வெல்பவர்களுக்கும் ; ஓர் அணியுள் இருந்து
வெல்பவர்களுக்குமான பரிசுத் தொகை வேறுபாடு அனைத்து நாடுகளிலும் உண்டு.தமி
தமிழ்நாடு சார்பாக ஓர் அணி போயிருந்து அவர்கள் பதக்கம் வென்றிருந்தால்,
அணிக்குத்தான் பரிசுத் தொகை அறிவித்திருப்பார்கள். அது ஐந்து கோடியாக இருந்திருந்தாலும்
அதை கார்த்திகாவுக்கு பகிர்ந்துதான் அளித்திருப்பார்கள்.
குகேஷ் உலக சதுரங்க போட்டியில் வெற்றி பெற்றார், தனி நபர் ஆட்டம்,
5 கோடி பரிசுத் தொகை. ஆனால் தங்கை கார்த்திகா ஆசிய இளையோர் கபடி போட்டியில், குழு விளையாட்டில்
தங்கம் வென்றார். இரண்டும் வேறு..’’ என்கிறார்கள்.
குகேஷின் வெற்றி அபாரமானது, அதே சமயம் இங்கே கார்த்திகாவின் வெற்றியோடு
கார்த்திகாவின் வாழ்க்கைச் சூழலையும் பார்க்க வேண்டிய தேவை இருக்கிறது. எனவே அவருக்கு
கூடுதல் தொகை கொடுப்பதே நியாயம்.
