தங்களுடைய தலைவரை நேரில் பார்த்தே தீரவேண்டும் என்று ஆசை ஆசையாக கரூருக்கு ஓடிவந்த ரசிகர்கள், கூட்ட நெரிசலில் சிக்கி செத்துப் போயிருக்கிறார்கள். அந்த ரசிகர்களுக்கு ஒரு சொட்டு கண்ணீர் கூட சிந்தாமல், விஜய் ஊரை விட்டு அவசரம் அவசரமாக எஸ்கேப் ஆகியிருக்கிறார்.
இந்த சந்தர்ப்பத்தைப் பயன்படுத்தி விஜய்யை முடக்கும் அளவுக்கு பிண அரசியலை திமுக செய்யத் தொடங்கியிருக்கிறது. விஜய்க்கு தலைமைப் பண்பு இல்லை, வீட்டுக்குள் முடங்கிக்கிடக்கிறார், விஜய் ஒரு கோழை என்றெல்லாம் திமுக ஐடி விங் திட்டமிட்டு செய்தி பரப்பிவருகிறார்கள்.
கள்ளக்குறிச்சியில் 68 பேர் சாராயம் குடித்து செத்துப்போன நேரத்தில் அங்கு எட்டிக்கூட பார்க்காத ஸ்டாலின், கரூருக்கு நள்ளிரவில் வந்து பார்வையிடுகிறார். விஜய் அங்கு வரவில்லை என்றதும் மக்களைக் காப்பாற்ற வந்த ரட்சகன் போன்று ஒரு பிம்பத்தை ஏற்படுத்துகிறார்.
கரூரில் செத்தவர்கள் மக்கள் என்றால் கள்ளக்குறிச்சியில் செத்ததும் மக்கள்தானே, அங்கே முதல்வர் போனாரா..? சென்னை ஏர் ஷோவில் 5 பேர் நெரிசலில் மரணம் அடைந்தார்களே, அவர்கள் குடும்பத்தைப் பார்க்கப் போனாரா..? அரசியல் ஆதாயம் எங்கே கிடைக்கும் என்று பார்த்து போயிருக்கிறார் ஸ்டாலின் என்று விஜய் கட்சியினர் புலம்புவதில் நியாயம் இருக்கத்தான் செய்கிறது.
விஜய் நேரில் சென்று யாரையும் சந்திக்கவில்லை என்பதில் கொஞ்சம் அர்த்தம் இருக்கிறது. அவரது கட்சியின் இரண்டாம் கட்டத் தலைவர்கள் கூட கரூருக்குச் செல்லவில்லை என்பது அரசியல் அபத்தம். விஜய் கட்சி நடத்துகிறாரா, சினிமா சூட்டிங் நடத்துகிறாரா என்றே தெரியவில்லை.
