அரசியல்வாதிகள் வாக்குறுதிகள் கொடுக்கிறார்கள், வாய் கிழியப் பேசுகிறார்கள். அவற்றை எல்லாம் பேச்சுரிமை என்று கண்டுகொள்ளாத நீதிமன்றம் கமல்ஹாசனின் கன்னட பேச்சை மட்டும் வில்லங்கமாக எடுத்துக்கொண்டு மன்னிப்பு கேட்கச் சொல்வது கடும் சர்ச்சையை உருவாக்கியுள்ளது.
கமல்ஹாசன் ‘தக் லைஃப்’ திரைப்படத்தின் இசை வெளியீட்டு விழாவில், “கன்னடம் தமிழ் மொழியில் இருந்து பிறந்தது” என்று போகிற போக்கில் ஒரு கருத்து கூறியதை அடுத்து கர்நாடகாவில் பெரும் எதிர்ப்புகள் எழுந்தன. கன்னட இலக்கிய பரிசத் இந்த கருத்தை நீதிமன்றத்தில் எதிர்த்தது. இதையடுத்து கர்நாடக உயர்நீதிமன்றம், கமல்ஹாசனின் கருத்தை கடுமையாக கண்டித்து, “நீங்கள் ஒரு வரலாற்று ஆய்வாளர் தானா?” என்று கேள்வி எழுப்பியுள்ளது. நீதிமன்றம், கன்னடம், நிலம், நீர் மற்றும் மொழி ஆகியவை கர்நாடக மக்களுக்கு புனிதமானவை என்றும், அவற்றை இழிவுபடுத்துவது ஏற்றதல்ல என்றும் தெரிவித்துள்ளது.
மன்னிப்பு கேட்கவில்லை என்றால் படம் வெளியாகாது என்ற நிலையிலும், ‘தவறு செய்திருந்தால் மட்டுமே மன்னிப்பு கேட்க வேண்டும், தவறாகப் புரிந்துகொண்டதற்கு மன்னிப்பு கேட்க முடியாது. பட வெளியீட்டை தள்ளி வைக்கிறேன்’ என்று தெரிவித்துவிட்டார். இதையடுத்து பிரச்னை மேலும் பெரிதாகியிருக்கிறது.
இந்தியா வேற்றுமையில் ஒற்றுமை கொண்ட நாடு. பல்வேறு மொழிகள் பேசுகின்ற மக்கள் உள்ளனர். அவரவருக்கு அவர்கள் பேசும் மொழி பெரிது. அவரவர் தாய்மொழியை உயர்த்தி பேசுவது தவறில்லை. கமல் தாய்மொழியை உயர்த்தி பேசியது வரவேற்கதக்கது. மற்ற மொழியுடன் ஒப்பிட்டு பேசியிருக்கத் தேவையில்லை என்றாலும், இதையெல்லாம் ஒரு குற்றம் என்று நீதிமன்றம் தீவிரம் காட்டுவது ஆச்சர்யமாக உள்ளது.
தென்னிந்திய மொழிகள் எல்லாமே ஒரு குடும்பத்தைச் சேர்ந்தவை என்பதில் யாருக்கும் மாற்றுக்கருத்து இருக்க முடியாது. அப்படியிருக்கையில் எதற்கு இந்த வில்லங்கம்…?
