ஜெயலலிதா வீட்டு வாசலில் நின்று கூட்டணிக்கு பிச்சை எடுத்த பா.ஜ.க. இப்போது டெல்லிக்கு அதுவும் அமித் ஷா வீட்டுக்கு வரவழைத்து எடப்பாடி பழனிசாமிக்கு நெருக்கடி கொடுக்கிறார்கள். அப்படி ஒரு வேளை கூட்டணிக்கு எடப்பாடி பழனிசாமி ஒப்புக்கொள்ளவில்ல என்றால், என்ன நடக்கும் என்பதையும் அவர் கண் முன்னே நடத்திக் காட்டுகிறார்கள்.
அண்ணா தி.மு.க.வின் மூத்த தலைவர்களில் ஒருவரான செங்கோட்டையன் கட்சித் தலைமையின் அனுமதியும் பெறாமல் மத்திய அமைச்சர்களை டெல்லிக்குப் போய் சந்தித்துப் பேசுகிறார். அதை கேள்வி கேட்க முடியாமல், அவரை கட்சியிலிருந்து வெளியேற்ற முடியாத அளவுக்கு எடப்பாடி பழனிசாமி பலவீனமாக இருக்கிறார்.
எடப்பாடி பழனிசாமி மட்டுமின்றி அவரது மாஜி அமைச்சர்களும் பா.ஜ.க.வை எதிர்க்க முடியாமல் அமைதி காக்கிறார்கள். ஏனென்றால் எல்லோர் மீதும் ஊழல் வழக்குகள் உள்ளன. எனவே, சிபிஐ, அமலாக்கத்துறைக்கு அஞ்சி பா.ஜ.க. அடிமையாக இருக்கத் தயாராக இருக்கிறார்கள்.
இன்றைய நிலையில் பா.ஜ.க.வுக்குத் தான் அ.தி.மு.க. தேவை. அதனாலே எப்படியாவது அ.தி.மு.க.வை கூட்டணியில் சேர்த்துக்கொண்டு வெற்றி பெற நினைக்கிறார்கள். இந்த கூட்டணி அடுத்த நாடாளுமன்றக் கூட்டணிக்கும் தேவை என்று நினைக்கிறார்கள். தி.மு.க.வை அழிக்க வேண்டும் என்பதற்காக பா.ஜ.க.வுடன் சேர வேண்டுமா என்பதே தொண்டர்கள் எழுப்பும் கேள்வி. ஏனென்றால், எடப்பாடி பழனிசாமி பலவீனமாக இருந்தாலும், கட்சி வலிமையாகவே இருக்கிறது.
எனவே, உறுதியாக எடப்பாடி பழனிசாமி நிற்க வேண்டும் என்பதே நிர்வாகிகள், தொண்டர்கள் கருத்தாக இருக்கிறது. என்ன செய்யப்போகிறார் எடப்பாடி பழனிசாமி..?
