விஜய்யுடன் ராகுல்காந்தி பேச்சுவார்த்தை.. திமுக கூட்டணிக்கு ஆபத்து..?

கரூர் நெரிசல் சம்பவம் தருணத்தில் நடிகர் விஜய்யுடன் ராகுல்காந்தி பேசியதாக சொல்லப்பட்டது. இதை ராகுல்காந்தி, விஜய் ஆகிய இருவரும் மறுக்கவும் இல்லை, ஒப்புக்கொள்ளவும் இல்லை. இந்நிலையில் மீண்டும் ராகுல்காந்தி கூட்டணி குறித்து விஜய்யுடன் பேசி முடித்துவிட்டார் என்று சொல்லப்படுவது திமுக கூட்டணியில் கடும் சலசலப்பை ஏற்படுத்தியிருக்கிறது.

இதுகுறித்து பேசும் காங்கிரஸ் கட்சியினர், ‘’ஆட்சி அதிகாரத்தில் பங்கு கொடுக்காத திமுகவுடன் இனியும் இருந்தால் காங்கிரஸ் கட்சியை வளர்க்க முடியாது என்பதால் ஆட்சி அதிகாரத்தில் பங்கு கொடுக்கும் தவெகவுடன் கூட்டணி வைக்கவும் கேரளா புதுச்சேரியில் காங்கிரஸ் ஆட்சியை பிடிக்கவும் தவெக வுடன் கூட்டணி வைக்கலாம் என்று மூத்த நிர்வாகிகள் கொடுத்த ஐடியாவின் அடிப்படையில் விஜய்யுடன் ராகுல் பேசிவிட்டார்.  

ஏனென்றால் கடந்த தேர்தல்களில் காங்கிரஸ் கட்சிக்கு பெரும்பாலான தொகுதிகள் வழங்கிய திமுக, இம்முறை அந்த எண்ணிக்கையை வெகுவாக குறைக்க திட்டமிட்டுள்ளதாக தகவல் வெளியாகி உள்ளது. இதன் அடிப்படையில் வரும் தேர்தலில் 10 சீட் கொடுத்தால் போதும் என்று தெரிவிக்கப்பட்டு வருகிறது. அதனாலே புதிய கூட்டணிக்கு ராகுல் அச்சாரம் போட்டுள்ளார்’’ என்கிறார்கள்.

அதேநேரம் திமுகவினர், ‘’காங்கிரஸ் கட்சியில் கீழ்மட்டத் தலைவர்கள் பற்றி யாருக்கும் கவலை இல்லை. ராகுல் எப்போதும் ஸ்டாலின் ஆதரவில் கட்சியை வளர்க்கவே விரும்புவார். காங்கிரஸ் கட்சிக்கு முஸ்லிம் வாக்குகள், கிறிஸ்தவ வாக்குகள், நாடார் சமூக வாக்குகள் அதிகம் உள்ளன. இவற்றை திமுக இழக்க விரும்பாது.

திமுக கூட்டணியில் இருந்து விடுதலை சிறுத்தைகளை பிரிக்கும் முயற்சியை விஜய் கட்சியினர் எடுத்துவைத்தார்கள். அது சக்சஸ் ஆகவில்லை என்றதும் இப்போது அவர்களே வேண்டுமென்று காங்கிரஸ் புரளியை பரப்புகிறார்கள். ராகுல் பேசவும் இல்லை, கூட்டணி குறித்து பேசவும் இல்லை. இதுவே நிஜம்’’ என்கிறார்கள்.

தவெகவினரிடம் கேட்டால், ‘’கூட்டணி விவகாரம் நடந்துகொண்டு இருக்கிறது. அனைத்துக் கட்சிகளும் வரிசையில் நிற்கிறார்கள். ராகுல் காந்தி தினமும் பேசுகிறார்’’ என்கிறார்கள்.

திமுக கூட்டணியை துண்டு போட முயற்சிக்கும் விஜய் டீம் வேண்டுமென்றே இப்படி செய்து பரப்புவது உறுதியாகியுள்ளது. போகிற போக்கைப் பார்த்தால் விஜய் தனியே நிற்க வேண்டிய சூழல் உருவாகிவிடும் போலிருக்கிறது.