விஜய்யின் கடைசி படமான ஜனநாயகன் தொலைக்காட்சி உரிமம் சன் டிவிக்கு
55 கோடி ரூபாய்க்கு விற்பனை செய்யப்பட்டுள்ளதாகவும், ஓடிடி உரிமம் அமேசான் ப்ரைமுக்கு
120 கோடிக்கு கொடுக்கப்பட்டுள்ளதாகவும் தகவல்கள் வெளியாகியுள்ளன. விஜய்யின் திமுக எதிர்ப்பு
அரசியல் சூடு பிடித்திருக்கும் நேரத்தில் ஜனநாயகன் டிவி உரிமத்தை சன் டி.வி.க்குக்
கொடுத்திருப்பது விஜய் ரசிகர்களை அதிர வைத்திருக்கிறது.
எச்.வினோத் இயக்கத்தில் நடிகர் விஜய்யுடன் பூஜா ஹெக்டே, மமிதா
பைஜு, பாபி தியோல், கெளதம் மேனன், பிரியாமணி, பிரகாஷ் ராஜ் ஆகியோர் நடித்திருக்கும்
இந்த படத்துக்கு அனிருத் இசையமைக்கிறார்.
இந்த படம் வரும் ஜனவரிக்கு பொங்கலையொட்டி ரிலீஸ் செய்யப்படும்
என்று கூறப்பட்டுள்ளது. இந்த படத்தை இதுவரை இல்லாத வகையில் அதிக தொகையாக 55 கோடிக்கு
சன் டிவி வாங்கியிருக்கிறது. மேடைகளில் ஆணித்தரமாக திமுக-வைத்தான் தங்களது எதிரி என்று
அறிவித்த விஜய், இப்போது அவர்களுக்கு சொந்தமான சேனலிடமே பிசினஸ் டீலிங் முடிக்கலாமா
என்று அவரது ரசிகர்கள் அதிர்ந்துபோயிருக்கிறார்கள்.
சன் டிவி இந்த படத்தை வாங்கினாலும் தேர்தலுக்குள் வெளியிடாமல்
முடக்கிவிட அதிக வாய்ப்பு உண்டு என்று விஜய் ரசிகர்கள் எதிர்ப்பு தெரிவிக்கிறார்கள்.
ஏனென்றால் ஏப்ரலில் தேர்தல் நடக்கும். அந்த நேரத்தில் படத்தை வெளியிட்டால், அது விஜய்க்கு
சாதகமாக இருக்கும். அதை சன் டிவி விரும்பாது. எனவே, வேறு சேனலுக்குப் படத்தைக் கொடுங்கள்
என்கிறார்கள்.
படக்குழு இது பற்றி இன்னமும் வாய் திறக்கவே இல்லை என்பதுதான் ஆச்சர்யம்.
