கரூர் நெரிசல் மரணம் விஜய்க்கு எக்கச்சக்க பாடம் கற்றுக் கொடுத்திருக்கிறது.
அரசியலில் அத்தனை எளிதாக ஜெயித்துவிட முடியாது என்பதை புரிந்திருக்கிறார். அதேநேரம்,
அதிமுகவுடன் கூட்டணி சேர்வதற்கு தயக்கமும் காட்டுகிறார்.
இதுகுறித்து பேசும் தவெகவினர், ‘’அதிமுக ஏற்கனவே என்.டி.ஏ கூட்டணியில்
இருக்கிறார்கள். பாஜகவை விட்டு வரமாட்டார்கள். அப்படி இருக்க என்டிஏ கூட்டணியில் போய்
சேர்ந்தால் மக்களுக்கு முதல் தேர்தலிலேயே நம் மீது இருக்கும் நம்பிக்கை குறைந்து விடும்.
ஆட்சி அதிகாரத்தில் பங்கு என்பது விஜய்யை முதல்வர் வேட்பாளராக
ஏற்றுக் கொண்டு வரக்கூடிய கட்சிகளுக்குத் தான் அது பொருந்தும். ஆனால் அதிமுகவில் எடப்பாடி
பழனிசாமி முதல்வர் பதவியை விட்டுக் கொடுக்க மாட்டார். எனவே, எடப்பாடியை முதல்வர் ஆக்கி
அழகு பார்க்க முடியாது.
திமுகவுக்கு போட்டி தவெக என்கிற களத்தைத்தான் நாம் கட்டமைக்க நம்ம
விரும்புகிறோம். அதிமுகவுக்கு வேண்டுமானால் வலிமையான கட்சிகள் கூட்டணிக்குத் தேவைப்படலாம்.
நமக்கு அப்படி இல்லை.
அது மட்டுமின்றி 234 தொகுதிகளிலும் பல்ஸ் பார்க்க வேண்டும். அனைத்து
தொகுதிகளிலும் வேட்பாளர்களை இறக்காவிட்டாலும் தவெக தலைமையில் தனி பெரும்பான்மையாக மூன்றில்
இரண்டு பங்கு தொகுதிகளில் தவெக வேட்பாளர்களை நிறுத்த வேண்டும். அப்போதுதான் கட்சியின்
எதிர்கால அரசியலுக்கும், அது பெரிதாக உதவிகரமாக இருக்கும்…’’ என்று கணக்கு போட்டே கூட்டணியைத்
தவிர்க்கிறார்.
அதேநேரம் அதிமுகவினர், ‘’இப்போது இப்படித்தான் பேசுவார்கள். தேர்தல்
நெருங்கியதும் தானாக வந்து நிற்பார்’’ என்று இன்னமும் நம்பிக்கையோடு இருக்கிறார்கள்.
அதேநேரம், பொது சின்னம் கேட்டு தேர்தல் கமிஷனை அணுகியுள்ளனர்.
என்னென்ன சின்னம் கேட்கப்பட்டது என்று நிர்வாகிகளிடம் பேசினோம்.
’’தவெக கொடுத்துள்ள பொதுவான 10 சின்னங்கள் அடங்கிய பட்டியலில்
வெற்றிக்கோப்பை, ஆட்டோ, கிரிக்கெட் பேட், விசில் சின்னம் போன்றவை இடம் பெற்றுள்ளன.
வேட்டைக்காரன் படத்தில் விஜய் ஆட்டோ ஓட்டுவார். பைரவா படத்தில் விஜய் கிரிக்கெட்
விளையாடுவார். பிகில் படத்தில் விஜய் கபடி பயிற்சியாளராக விசிலுடன் இருப்பார்.
அதேபோல் பிகில் படத்தில் ‘கப் முக்கியம்’ என்று விஜய் சொல்வார். அதனால், வெற்றிக்கோப்பை
சின்னமும் கேட்டுள்ளோம். இவற்றில் ஒன்று கிடைத்தால் வெற்றி நிச்சயம்” என்கிறார்கள்
