கரூர் மக்களை சந்தித்த பிறகு விஜய் அரசியல் நகர்வுகள் மீண்டும்
சூடு பிடித்துள்ளன. நிர்வாகக் குழு கூட்டத்தை அடுத்து விஜய்யின் ஹாட்டான அறிக்கை வெளியானது.
இந்த நிலையில் விஜய்யுடன் கூட்டணி குறித்து அமித்ஷா பேசியிருக்கும் விவகாரம் வைரலாகிஆது.
நேற்று கட்சியின் தினசரிப் பணிகளை ஒருங்கிணைக்க 28 பேர் கொண்ட
புதிய நிர்வாகக் குழுவை தவெக தலைவர் விஜய் சந்தித்துப் பேசினார். பொதுச் செயலாளர்
என். ஆனந்த் தலைமை வகித்தார். தேர்தல் பிரச்சார மேலாண்மைப் பிரிவு பொதுச் செயலாளர்
ஆதவ் அர்ஜுனா, இணைப் பொதுச் செயலாளர் சிடிஆர்.நிர்மல்குமார் உள்ளிட்டோர்
கலந்துகொண்டனர்கரூர் சம்பவம் குறித்த விசாரணை, சிறப்பு பொதுக்குழுக் கூட்டம்
நடத்துவது குறித்து ஆலோசிக்கப்பட்டது. மேலும், தமிழக அரசு வழிகாட்டுதல்களை
வெளியிட்ட பின்னர் விஜய்யின் சுற்றுப் பயணத்தை தொடங்கவும் முடிவு செய்யப்பட்டது.
இதையடுத்து விஜய் வெளியிட்ட அறிக்கையில், ‘’தமிழக வெற்றிக்
கழகத்தின் படைக்கலன்களாக நீங்கள் இருக்கையில், நம்மைக் காக்கும் கவசமாக மக்கள்
இருக்கையில், அவர்களுடன் நமக்குள்ள உறவையும், அவர்களின் குரலாகத் தொடரும் நம்
வெற்றிப் பயணத்தையும் எவராலும் தடுக்க இயலாது. சூழ்ச்சிகளாலும், சூதுகளாலும் நம்மை
வென்றுவிடலாம் என்று கனவு காணும் எதிரிகளும் இதை உணர்ந்தே உள்ளனர்.
நமது அடுத்த அடியை இன்னும் நிதானமாகவும், தீர்க்கமாகவும்
நாம் எடுத்துவைக்க வேண்டும். இத்தகைய சூழலில் கட்சியின் அடுத்தகட்ட செயல்பாடுகள்
குறித்து விவாதிக்க வேண்டும். இவை குறித்து முடிவுகள் எடுக்கும் பொருட்டு பொதுக்குழுவின்
சிறப்புக் கூட்டத்தை நவம்பர் 5ம் தேதி கூட்ட முடிவு செய்துள்ளோம்…’’ என்று அறிவித்திருந்தார்.
இந்நிலையில் மத்திய உள்துறை அமைச்சர் அமித் ஷா, தவெகவுடன் கூட்டணி
குறித்த கேள்விக்கு, “தமிழ்நாட்டில் தேசிய
ஜனநாயக கூட்டணியை விரிவுபடுத்த விரும்புகிறோம். எந்த முடிவு எடுத்தாலும் கூட்டணியில்
அங்கம் வகிக்கும் கட்சிகளுடன் ஆலோசித்து முடிவெடுக்கப்படும்.. கரூர் சம்பவத்துக்கு
பிறகு விஜய்க்கு ஆதரவாக தவெக தலைவர்கள் பேசிவரும் நிலையில் அமித் ஷாவின் இந்த பேச்சு
முக்கியத்துவம் வாய்ந்ததாக பார்க்கப்படுகிறது. அமித்ஷாவின் உத்தரவின் பேரிலே விஜய்
நடவடிக்கை இருக்கிறதா என்ற கேள்வி எழுந்துள்ளது.
