கரூர் நெரிசல் விவகாரத்தில் பாதிக்கப்பட்ட மக்களை சந்தித்துவிட்ட
விஜய் ஒரு வழியாக கடும் நெருக்கடியில் இருந்து வெளியே வந்துவிட்டார். அதன் பிறகு அவரது
நடவடிக்கைகள் எல்லாமே செம வேகமாக இருக்கிறது.
கரூர் மக்கள் சந்திப்பு நிறைவடைந்ததும் விவசாயிகளுக்கு ஆதரவாக
அதிரடியாக அறிக்கை வெளியிட்டார். அதில், “கடந்த சில நாட்களாக பெய்த மழையால், நெல்மணிகள்
நனைந்து வீணாகியதற்கும், அதை விளைவித்த விவசாயிகளின் வேதனைகளுக்கும் ஸ்டாலின் தலைமையிலான
திமுக அரசு என்ன பதில் சொல்லப் போகிறது?’’ என்று கேள்வி எழுப்பியிருந்தார்.
அதோடு, தமிழக வெற்றிக் கழகத்தின் அன்றாடப் பணிகளையும் செயல்பாடுகளையும்
ஒருங்கிணைக்க, கரூர் மாவட்டச் செயலாளர் மதியழகன் உட்பட 28 நபர்களைக் கொண்ட புதிய நிர்வாகக்
குழுவை நியமித்து அறிவிப்பு வெளியிட்டார்.
அதே சூட்டோடு சூடாக தமிழக வெற்றிக் கழகத்தின் நிர்வாகக் குழுக்
கூட்டம், இன்று பனையூர் தலைமை நிலையச் செயலகத்தில் நடைபெற உள்ளது. கழகத் தலைவர் அவர்களின்
ஒப்புதலோடு நடைபெறும் இந்தக் கூட்டத்தில், நிர்வாகக் குழு உறுப்பினர்கள் அனைவரும் கலந்துகொள்கிறார்கள்.
விஜய் அரசியலை விட்டே வெளியேறிவிடுவார் என்று சிலர் கூறிவந்த நிலையில்
ஆக்டிவ் பாலிடிக்ஸை மீண்டும் கையில் எடுத்துள்ளார். அதோடு, பாதிக்கப்பட்ட விவசாயிகளை
பனையூருக்கு வரவழைத்து ஆறுதல் சொல்வதற்குத் திட்டம் இருப்பதாக சொல்லப்படுகிறது.
