தஞ்சையில் எடப்பாடி பழனிசாமி விசிட் செய்த நேரத்தில் பூங்கொடி
என்ற பெண் விவசாயி, முளைத்த நெல்லை எடப்பாடி பழனிசாமியிடம் காட்டியிருந்தார். இதற்கு
உதயநிதி, அந்த பெண்ணின் வயலில் நெல் அறுவடையே இன்னமும் நடைபெறவில்லை, அதற்குள் எப்படி
நெல்லைக் கொண்டுவந்து காட்ட முடியும் என்று கேள்வி எழுப்பியிருந்தார்.
இதற்கு வரவுக்கோட்டையைச் சேர்ந்த பூங்கொடி, ‘’நான் 5 ஏக்கரில்
குத்தகை சாகுபடி செய்து வருகிறேன். தற்போது அறுவடை செய்யும் தருவாயில் உள்ள
குறுவை நெற்கதிர்கள், அண்மையில் பெய்த மழையில் நனைந்து வயலிலேயே சாய்ந்து முளைவிடத்
தொடங்கியுள்ளன.
இந்நிலையில், காட்டூர் கொள்முதல் நிலையத்துக்கு பழனிசாமி
வருவதாகக் கூறியதால், விவசாயிகள் அங்கு சென்றோம். அப்போது நான், எனது வயலில்
மழையில் அழுகிய மற்றும் நெல்மணிகள் முளைவிட்ட நெற்பயிரை பழனிசாமியிடம் காண்பித்து,
பாதிப்பு குறித்து தெரிவித்தேன். நெல் கொள்முதல் நிலையத்துக்கு கொண்டுவந்த நெல்மணிகள்
முளைத்துவிட்டதாக நான் கூறவில்லை. பின்னர், அரசு அதிகாரிகள் எனது வயலைப் பார்வையிட்டனர்.
அப்போது வயலிலேயே முளைவிட்ட நெற்கதிர்களை படம் பிடித்தனர்.
நான் ஒன்றரை லட்சம் செலவு செய்து சாகுபடி செய்தேன். தற்போது அறுவடை செய்யமுடியாத
நிலை ஏற்பட்டுள்ளது. அறுவடையை முடித்து, அதில் கிடைக்கும் வருவாயைக் கொண்டு,
மழையில் ஒழுகும் கூரை வீட்டை சரி செய்ய வேண்டும் என்று கருதியிருந்தேன். ஆனால்,
மழையில் நனைந்து நெல்மணிகள் முளைத்துள்ளதால், வேதனையாக உள்ளது…’’ என்று கூறியிருக்கிறார்..
நிவாரணம் கேட்கும் பெண் விவசாயிக்கு அதை கொடுக்காமல் குற்றம் சாட்டுவது
எப்படி சரியாக இருக்கும் என்பதை உதயநிதியே கூற வேண்டும்.
