கொட்டும் மழையில் வயலில் இறங்கி ஆய்வு… இபிஎஸ் அதிரடி

அடாது கொட்டும் மழையைப் பொருட்படுத்தாமல் அதிமுக பொதுச்செயலாளரும் எதிர்க்கட்சித் தலைவருமான எடப்பாடி பழனிசாமி, தஞ்சை மாவட்டத்தில் விவசாயிகளை சந்தித்து குறைகளை கேட்டறிந்தார்.

டெல்டா மாவட்டங்களில் பெய்து வரும் தொடர்மழையால் அறுவடைக்கு தயாராக இருந்த நெற்பயிர்கள் மழை நீரில் மூழ்கி சேதம் அடைந்தன. அது மட்டுமல்லாது, நேரடி நெல் கொள்முதல் நிலையங்களுக்கு விற்பனைக்கு கொண்டு வரப்பட்டு கொட்டி வைக்கப்பட்டு இருக்கும் நெல் மணிகளும் முளைக்க தொடங்கி விட்டன.

போதிய அளவுக்கு நெல் கொள்முதல் நிலையங்கள் திறக்கப்படாத காரணங்களால் விவசாயிகள் ரோட்டில் காத்துக்கிடக்கின்றனர். மழையில் இருந்து நெல் மூட்டைகள் பாதுகாக்க கொள்முதல் நிலையங்களில், தார்பாய் போன்ற பாதுகாப்பு அம்சங்கள் இல்லாததால், நெல் மணிகள் முளைக்க தொடங்கி விட்டன.

இந்த நிலையில் இன்று காலை இபிஎஸ், டெல்டா மாவட்டங்களில் ஆய்வு மேற்கொண்டார். தஞ்சை மாவட்டம், காட்டூரில் கனமழையால் ஏற்பட்டுள்ள பாதிப்புகளை வயலில் இறங்கி பார்வையிட்டு ஆய்வு செய்தார். பின்னர் விவசாயிகளிடம் குறைகளைக் கேட்டறிந்தார். நெல் கொள்முதல் நிலையங்களில் தினமும் 2000 மூட்டைகள் நெல் எடுத்திருந்தால் இந்த தேக்கம் இருக்காது என்று விவசாயிகள் தெரிவித்தனர்.

தொடர்ந்து இபிஎஸ் தஞ்சை, திருவாரூர் பகுதிகளில் ஆய்வு மேற்கொண்டு வருகிறார்.