எடப்பாடியிடம் செங்கோட்டையன் சரண்டர்… ? சட்டமன்றத்தில் கருப்புப்பட்டை

அதிமுகவில் இருந்து அனைத்துப் பொறுப்புகளிலும் இருந்து தூக்கப்பட்ட செங்கோட்டையன் இன்று மற்ற அதிமுக எம்.எல்.ஏ.க்கள் போலவே கருப்புப்பட்டை அணிந்து சட்டமன்றக் கூட்டத்தில் கலந்துகொண்ட விவகாரம் கட்சியில் சலசலப்பை உருவாக்கியிருக்கிறது.

தமிழக சட்டப்பேரவையின் மழைக்காலக் கூட்டத் தொடர் அக்டோபர் 14ம் தேதி தொடங்கியது. முதல் நாள் கரூர் துயரத்தில் பலியான 41 பேர், மறைந்த அதிமுக சட்டமன்ற உறுப்பினர் அமுல் கந்தசாமி மற்றும் மறைந்த முன்னாள் சட்டமன்ற உறுப்பினர்களுக்கு இரங்கல் தீர்மானம் வாசிக்கப்பட்டு, இரண்டு நிமிடம் மவுன அஞ்சலி செலுத்தியதோடு, முடித்துவைக்கப்பட்டது.

சட்டப்பேரவை மழைக்காலக் கூட்டத்தொடரின் இரண்டாம் நாளான இன்று கரூர் துயரத்தை அனுசரிக்கும் வகையில் அதிமுக எம்.எல்.ஏக்கள் இடது கையில் கைப்பட்டை அணிந்துவந்தனர். கட்சிக்கு எதிரான நடவடிக்கை ஈடுபட்டதால், கட்சிப் பொறுப்புகளில் இருந்து நீக்கம் செய்யப்பட்ட அதிமுக எம்.எல்.ஏவும், முன்னாள் அமைச்சருமான செங்கோட்டையனும் தனது இடது கையில் கருப்புக் கைப்பட்டை அணிந்துவந்தார்.சிறைக் கைதிகளா அதிமுக எம்.எல்.ஏக்கள்?

கேள்வி நேரத்தின்போது முன்னாள் அமைச்சர் அக்ரி கிருஷ்ணமூர்த்தி பேசும்போது, சபாநாயகர் அப்பாவு அவர்கள், “கையில் என்ன கருப்பு பட்டை அணிந்து வந்திருக்கிறீர்கள்?” என்று கேட்டபோது, “உங்கள் கவனத்தை ஈர்க்கத்தான்” என்று அக்ரி கிருஷ்ணமூர்த்தி பதிலளித்தார்.

இந்த கூட்டத்தில் செங்கோட்டையனும் கையில் கருப்புப்பட்டையுடன் வந்திருப்பதை பார்த்து, எடப்பாடியிடம் சரண்டர் ஆகிவிட்டார் என்று கூறினார்கள். அதேநேரம், கொறடா உத்தரவை மீறினால் சிக்கல் வரலாம் என்பதற்காக இப்படி வந்திருக்கிறார், எடப்பாடியுடன் சமாதானத்துக்கு வாய்ப்பே இல்லை என்றும் சொல்கிறார்கள். இன்று பன்னீர்செல்வம் கையில் கருப்புப்பட்டை அணியவில்லை என்பது குறிப்பிடத்தக்கது.