திருமாவளவன் காருக்கு முன் வேண்டுமென்றே வம்பு செய்தார் என்று
ராஜீவ் காந்தி என்ற வழக்கறிஞர் மீது விடுதலை சிறுத்தைகள் கட்சியினர் பாய்ந்த விவகாரம்
வில்லங்கமாகிவருகிறது. பார் கவுன்சில் விசாரணைக் குழு அமைத்திருக்கும் நிலையில் திருமாவளவன்
மீது நடவடிக்கை எடுக்க முடியுமா என்ற கேள்வி எழுகிறது.
சென்னை உயர்நீதிமன்ற நுழைவாயிலுக்கு வெளியில், திருமாவளவன் வருகை
தந்த நேரத்தில் ராஜீவ் காந்தி என்ற வழக்கறிஞரின் இருசக்கர வாகனம் மீது விசிக தலைவர்
திருமாவளவன் கார் மோதியதாக அவர் பிரச்னை செய்தார். அந்த நேரத்தில் அவரை விடுதலை சிறுத்தைகள்
கட்சியைச் சேர்ந்தவர்கள் தாக்கத் தொடங்கினார்கள்.
எனவே அவர் உயிருக்கு பயந்து ராஜீவ் காந்தி பார் கவுன்சில் அலுவலகத்தில்
தஞ்சம் அடைந்த நிலையில், அந்த அலுவலகத்திற்கு உள்ளேயே அத்துமீறி நுழைந்த வி.சி.கவினர்
ராஜீவ் காந்தியை சரமாரியாக தாக்கியதுடன் பார் கவுன்சில் பொருட்களையும் சேதப்படுத்தியுள்ளனர்.
தற்போது வழக்கறிஞர் ராஜீவ் காந்தி மருத்துவமனையில் அனுமதிக்கப்பட்டு சிகிச்சை பெற்று
வருகிறார்.
இந்த நிலையில் திருமாவளவன், ‘இது திட்டமிட்டு வேண்டுமென்றே நடத்தப்பட்ட
நாடகம். என்னுடைய கார் அவரது வாகனத்தை இடிக்கவே இல்லை. எங்களைப் பார்த்து முறைத்ததற்காக
எங்கள் கட்சியினர் நாலு தட்டு தட்டினார்கள். அதையும் ஒழுங்காக கூட செய்யவில்லை. அவர்
எந்த ஜாதி என்று பார்த்தெல்லாம் அடிக்கவில்லை’’ என்று தெரிவித்திருந்தார்.
இந்த நிலையில் திருமாவளவன் கார் தொடர்பான தாக்குதல் விவகாரம் குறித்து
விசாரணை நடத்த தமிழ்நாடு பார் கவுன்சில் குழு அமைத்து உத்தரவிட்டுள்ளது.
திருமாவளவன், ராஜீவ்காந்தி ஆகிய இருவரும் மாறி மாறி குற்றம் சாட்டும்
நிலையில், இது தொடர்பாக விசாரணை நடத்துவதற்கு குழு ஒன்றை அமைத்து தமிழ்நாடு மற்றும்
புதுச்சேரி பார் கவுன்சில் தலைவர் அமல்ராஜ் உத்தரவிட்டுள்ளார். பார் கவுன்சில் துணைத்
தலைவர்கள் அருணாச்சலம், சரவணன் அடங்கிய இந்த குழு விசாரணை நடத்தி இரண்டு வாரத்தில்
பதிலளிக்க உத்தரவிடப்பட்டுள்ளது.
இந்த உத்தரவின் அடிப்படையில் திருமாவளவன் மீது நீதிமன்றத்தை நாடி
நடவடிக்கை எடுக்கவும் வாய்ப்பு இருப்பதாக சொல்லப்படுகிறது.
