சட்டப்பேரவை வளாகத்தில் நேற்று எடப்பாடி பழனிசாமி திடீரென உருட்டுக்கடை
அல்வா என்று ஒரு பாக்கெட் தூக்கிக் காட்டினார். திமுகவின் உருட்டுக்கடை அல்வா குறித்து
அவர், ‘’திமுக ஆட்சி என்பது உருட்டுக்கடை அல்வா… இந்த அரசாங்கத்தில் இப்படிப்பட்ட அல்வாதான்
கிடைக்கும். கடந்த 2021ம் ஆண்டில் தீபாவளியின்போது 525 அறிவிப்புகளை வெளியிட்டார் முதல்வர்
ஸ்டாலின். அதில் 10% அறிவிப்பை கூட நிறைவேற்றவில்லை. அனைவருக்கும் அல்வா கொடுத்துவிட்டார்.
இந்த உருட்டுக்கடை அல்வாவை பிரிச்சுப் பாருங்க… எப்படி டேஸ்டா இருக்குதான்னு சொல்லுங்க’
என்றபடி அனைவருக்கும் பாக்கெட் கொடுக்கப்பட்டது. அந்த பாக்கெட்டில் எதுவும் இல்லை.
திமுக எல்லோருக்கும் அல்வா கொடுத்துவிட்டது என்பதைக் காட்டும் வகையில் உருட்டுக் கடை
அல்வா பாக்கெட்டை இபிஎஸ் வெளியிட்டது பெரும் வைரலாகிவருகிறது.
உடனடியாக இதற்கு பதிலடி கொடுப்பது போன்று திருட்டுக் கடை அல்வா
என்று திமுக ஐடி விங் இறங்கியடித்தது. இது குறித்து அமைச்சர் சிவசங்கர், ‘’இன்று அல்வா
பாக்கெட்டை வைத்துக்கொண்டு, ‘உருட்டு கடை அல்வா’ என்றெல்லாம் கதைவிட்டிருக்கிறார் எதிர்க்கட்சித்
தலைவர் எடப்பாடி பழனிசாமி அதிமுக எப்படி இவரின் கைக்கு வந்தது என்று எல்லோருக்கும்
தெரியும். அதிமுகவை ஒரு திருட்டுக் கடையாக, எல்லோரிடமும் இருந்து கைப்பற்றியவர் எடப்பாடி
பழனிசாமி” என்று கடும் விமர்சனம் வைத்திருக்கிறார்.
இந்த விவகாரம் நேற்று முதல் சமூகவலைதளத்தில் பெரும் வைரலாகிவருகிறது.
