எடப்பாடி பழனிசாமி மேற்கொள்ளும் எழுச்சிப்பயணத்தில் விஜய் கட்சியினர்
கொடியுடன் ஆஜராவது தொடர்ந்து நடந்துவருகிறது. நேற்றைய கூட்டத்தில் பேசிய எடப்பாடி பழனிசாமி,
‘மெகா கூட்டணி உறுதியாகிறது. பிள்ளையார் சுழி போட்டாச்சு’ என்று விஜய் கட்சி கொடியைக்
கை காட்டி பேசியது வைரலாகிவருகிறது.
அதோடு அதிமுக பொதுச்செயலாளர் பழனிசாமி, தவெக தலைவர் விஜய்யை தொலைபேசியில்
தொடர்புகொண்டு ஆறுதல் கூறியிருப்பதாகவும் தொடர்ந்து ஆதரவு தருவதாகவும் உறுதி கொடுத்ததாக
சொல்லப்படுகிறது.
கடந்த செப்.27-ம் தேதி கரூரில் மேற்கொண்ட பிரச்சாரத்தின்போது ஏற்பட்ட
கூட்ட நெரிசலில் 41 பேர் உயிரிழந்தனர். இச்சம்வம் தொடர்பாக விசாரிக்க முன்னாள் நீதிபதி
அருணா ஜெகதீசன் தலைமையில் ஒரு நபர் ஆணையத்தை முதல்வர் ஸ்டாலின் அமைத்துள்ளார்.
இதற்கிடையில் இச்சம்பவம் தொடர்பாக சென்னை உயர்நீதிமன்றம் மற்றும்
சென்னை உயர் நீதிமன்ற மதுரை கிளையில் வழக்குகள் தொடரப்பட்டுள்ளன.
சென்னையில் தொடரப்பட்ட வழக்கில், விஜய் பிரச்சாரத்துக்கு செல்லும்போது
இருசக்கர வாகனத்தின் மீது மோதிய விவகாரத்தில் வழக்கு பதியவும், பிரச்சார வாகனத்தை பறிமுதல்
செய்யவும் உத்தரவிடப்பட்டுள்ளது. ஐபிஎஸ் அதிகாரி அஸ்ராகார்க் தலைமையில் சிறப்பு புலனாய்வு
குழுவையும் நீதிமன்றம் அமைத்துள்ளது. அக்குழுவும் விசாரணையை தொடங்கியுள்ளது. நெரிசல்
மரணம் விவகாரத்தில் தவெக நிர்வாகிகள் மீது வழக்கு பதிவு செய்துள்ள நிலையில், அவர்கள்
தலைமறைவாகியுள்ளனர்.
இந்த நெரிசல் மரண சம்பவத்துக்கு அரசின் கவனக்குறைவே காரணம் என
அதிமுக பொதுச்செயலாளர் பழனிசாமி உள்ளிட்ட எதிர்க்கட்சி தலைவர்கள் குற்றஞ்சாட்டி வருகின்றனர்.
இதனிடையே விஜய்யிடம் மத்திய உள்துறை அமைச்சர் அமித் ஷாவும், காங்கிரஸ்
மூத்த தலைவர் ராகுல் காந்தியும் தொலைபேசியில் தொடர்பு கொண்டு பேசியதாக தகவல் வெளியானது.
இதனால் இவ்விரு கட்சிகளுடன் விஜய்யை தங்கள் கூட்டணிக்கு இழுக்க முயற்சிப்பதாக கூறப்பட்டது.
இந்த சூழலில் விஜய் தனியாக போட்டியிடுவது சிரமம், அனுபவம் வாய்ந்த
கட்சிகளுடன் கூட்டணி அமைத்து, 2026 தேர்தலை சந்திப்பது நல்லது என, அவருக்கு நெருக்கமான
சிலர் ஆலோசனை கூறியிருப்பதாக அரசியல் வட்டாரங்களில் கூறப்படுகிறது. அதிமுக பொதுச்செயலாளர்
பழனிசாமி, விஜய்யை கடந்த அக்.6-ம் தேதி மாலை தொலைபேசியில் தொடர்பு கொண்டு ஆறுதல் தெரிவித்ததாகவும்,
கூட்டணிக்கு வருமாறு அழைத்ததாகவும் தகவல் வெளியாகியுள்ளது.
இதையடுத்தே மெகா கூட்டணிக்கு பிள்ளையார் சுழி போட்டாச்சு என்று
எடப்பாடி பழனிசாமி பேசியிருப்பதாகச் சொல்லப்படுகிறது.
