கரூருக்கு விஜய் நிவாரண உதவி எப்போது..? சிபிஐ அனுமதியில் குழப்பமோ குழப்பம்

அஜித்குமார் வீட்டுக்குச் செல்லும்போது விஜய் யாரிடமும் அனுமதி கேட்கவில்லை, இப்போது கரூருக்கு மட்டும் அனுமதி கேட்பது பல்வேறு கேள்விகளை எழுப்பியிருக்கிறது.

கரூர் சம்பவத்தைக் கேள்விப்பட்டதும் உடனடியாக ஊரை விட்டு காலி செய்து கிளம்பினார் விஜய். ஆனால், கரூருக்கு அடுத்த நாளே சென்ற  எடப்பாடி பழனிசாமி யாரிடமாவது அனுமதி வாங்கிச் சென்றாரா? சீமான் யாரிடமாவது அனுமதி வாங்கிச் சென்றாரா? திருமாவளவன், பிரேமலதா விஜயகாந்த், நயினார் நாகேந்திரன், கமல்ஹாசன், அண்ணாமலை, இன்னும் பிறர் யாரிடமாவது அனுமதி வாங்கிச் சென்றனரா…?

ஒரு அரசியல்கட்சியின் போராட்டம், ஆர்ப்பாட்டம், பொதுக்கூட்டம் பிரச்சாரம் என்றால் அனுமதி கேட்கலாம் ஆனால், ஒரு விசிட்டுக்கு எதுக்கு.கேட்கிறார் என்று கேள்வி எழுப்புகிறார்கள். அதாவது, போலீஸ் மறுப்பு தெரிவித்தால் அதை வைத்து போகாமல் தவிர்க்கலாம் என்று எண்ணுவதாகவே தெரிவிக்கிறார்கள்.

அதோடு அரசு உள்ளிட்ட மற்றவர்கள் அறிவித்த நிவாரண நிதியைக் கொடுத்துவிட்ட நிலையில், விஜய் இன்னமும் கொடுக்கவில்லை. நேரில் சந்திக்கும்போது கொடுப்பதற்காக வைத்திருப்பதும் சர்ச்சையாகியுள்ளது.

இந்த நிலையில் சிபிஐ விசாரணை கோரிக்கையை நாம் தமிழர் கட்சியினர் கடுமையாக கிண்டல் அடித்துள்ளனர். அதாவது, ‘’காவல்துறையினரால் படுகொலை செய்யப்பட்ட அஜித்குமாரின் வழக்கை, சிபிஐக்கு மாற்றுவதை எதிர்த்தார் விஜய். சிபிஐ என்பது ஆர்.எஸ்.எஸ்., பாஜகவின் கைப்பாவை எனவும் குற்றஞ்சாட்டினார். அன்றைக்கு அஜித்குமாரின் படுகொலைக்கு சிபிஐ விசாரணை செய்யப்படுவதை எதிர்த்து, நீதிமன்றத்தில் சிறப்புப் புலனாய்வு விசாரணை கோரியது தவெக.

இப்போது கரூர் மரணங்களுக்கு நீதிமன்றமே சிறப்புப் புலனாய்வு விசாரணை  அமைத்திருக்கிறது. அதனை எதிர்த்து, சிபிஐ விசாரணை கோருகிறது தவெக. தவெகவோடு சேர்த்து பாஜகவும் சிபிஐ விசாரணைதான் கோருகிறது. பாஜகவின் தலைவர்களும் விஜய்யின் பக்கம்தான் நிற்கிறார்கள். எனவே, பாஜகவின் பி டீம் விஜய் என்பது உறுதியாகிவிட்டது’’ என்கிறார்கள்.