கோவையில் புதிதாக 1791 கோடி ரூபாயில் 10 கி.மீ தூரத்திற்குக் கட்டப்பட்டுள்ள
தமிழ்நாட்டின் மிக நீண்ட கோவை – அவினாசி சாலை உயர்மட்ட மேம்பாலத்தை நேற்று ஸ்டாலின்
திறந்துவைத்தார்.
இந்த பாலத்துக்கு ஜி.டி.நாயுடு பேர் வைக்கப்பட்டதற்கு சீமான் கடுமையான
எதிர்ப்பு தெரிவித்திருந்தார். இதுகுறித்து சீமான், ‘இந்தியாவில் மேம்பாலம் கட்ட சராசரியாக
1 கி.மீ.க்கு 18 கோடி ரூபாய் செலவிட்டுக்கொண்டிருக்கும் பொழுது அதே 1 கி.மீ.க்கு
170 கோடி ரூபாய் மக்கள் பணத்தில் செலவழித்து கட்டப்பட்டிருக்கும் இப்பாலத்திற்கு ஜிடி
நாயுடு பேர் வைக்கப்பட்டது ஏன்..?
ஜி.டி.நாயுடுவை இந்தியாவின் எடிசன் என்று எப்படி கூறுகிறீர்கள்?
எடிசன் கண்டுபிடிப்புகள் உலகம் முழுவதும் பயன்பாட்டில் உள்ளது. ஜி.டி.நாயுடு கண்டுபிடிப்புகளில்
அப்படி எதுவொன்று இன்றளவும் மக்கள் பயன்பாட்டில் உள்ளது? எதற்காக அவர் பெயரை வைத்துள்ளீர்கள்?
ஜி.டி. என்பது உயிரெழுத்தா? மெய்யெழுத்தா? ஆங்கிலம் தானே?.
எங்கும் தமிழ், எதிலும் தமிழ் என்று முழங்கியவர்கள் ஜி.டி. என்று
ஆங்கில முன்னொட்டுக்களில் பெயர் சூட்டுவது ஏன்? இதுதான் திமுக ஆட்சியாளர்கள் தமிழை
வளர்க்கும் முறையா? எதிலும் சாதிப்பெயர்கள் இருக்கக்கூடாது; எல்லாவற்றிலும் சாதியை
ஒழித்துவிட்டோம் என்று பேசிய திராவிடத்திருவாளர்கள், பெயரின் பின்னால் சாதிப்பெயரை
நீக்கிய திராவிட இயக்கம் என்று நூற்றாண்டு விழா கொண்டாடியவர்கள் ஜி.டி.நாயுடு என்ற
சாதிப்பெயரைச் சூட்டுவது ஏன்?
திராவிட இயக்கத்தின் பிதாமகர் பெரியாரின் உடனிருந்த உற்ற தோழரின்
பெயரிலிருக்கும் சாதியையே ஒழிக்க முடியாதவர்கள் ஊரில் உள்ள சாதியை எப்படி ஒழிப்பீர்கள்?
இதுதான் திராவிட இயக்கம் சாதியை ஒழித்த முறையா? சென்னையில் நந்தனம் சாலைக்கு முதலில்
தெய்வத்திருமகன் முத்துராமலிங்கத்தேவர் சாலை என பெயர் வைத்துவிட்டு பிறகு அதை முத்துராமலிங்கனார்
சாலை என்று மாற்றிய இவ்வரசு பாலத்திற்கு சாதியோடு பெயரை சூட்டுவது ஏன்? பொது இடங்களுக்கு
தேவர், தேவேந்திரர் பெயர்களை வைத்தால் சாதி கலவரம் வரும்? வன்னியர், பறையர் பெயரை வைத்தால்
சாதி கலவரம் வரும் என்று தவிர்க்கும் தமிழ்நாடு அரசு, நாயுடு என்ற சாதிப்பெயரை வைப்பது
எப்படி? நாங்கள் வாண்டையார் என்றால் வரும் சாதி, நாங்கள் படையாட்சி என்றால் சாதி, நீங்கள்
நாயுடு என்றால் மட்டும் வராதா? நாயுடு என்பது சாதிப்பெயர் அல்லாமல் பொதுப்பெயரா?’’
என்று கடுமையாக எதிர்ப்பு தெரிவித்திருந்தார்.
இதற்கு திமுகவினர் பதில் சொல்வார்கள் என்று அனைவரும் எதிர்பார்த்த
நேரத்தில் அண்ணாமலை கை கொடுக்கும் வகையில் பேசியிருக்கிறார். அவர், ‘’ஜி.டி. நாயுடுவின்
பெயரை கோவை மேம்பாலத்திற்கு வைத்திருக்கிறார்கள். ஜி.டி. நாயுடு, ஜாதியை எல்லாம் தாண்டி
பொது தலைவர். கோவையில் அந்தப் பாலத்திற்கு ஒருவரின் பெயர் வைக்க வேண்டும் என்றால் அதற்கு
சரியான பெயர் ஜி.டி. நாயுடுதான். நாங்கள் ஜி.டி. நாயுடுவை சாதிய அடையாளத்திற்குள் அடைக்கவில்லை.
ஆனால், சாதி பெயர் நீக்கும் வழிகாட்டு நெறிமுறையில் கொடுக்கப்பட்டுள்ள
எடுத்துக்காட்டில் கருணாநிதி பெயர் இருக்கிறது. ஏன் எம்.ஜி.ஆர். பெயர் இல்லை. அதேபோல்,
பட்டியல் இனத்தில் பிறந்து மிகப்பெரிய தலைவர்களாக உருவான இரட்டை மலை சீனிவாசன், எம்.சி.
ராஜா என யார் பெயரும் அதில் இடம் பெறவில்லை. எனவே அரசு இந்த அரசாணையை திரும்ப பெற வேண்டும்’’
என்று கேட்டுக்கொண்டுள்ளார்.
அண்ணாமலைக்கும் திமுகவுக்கும் இப்படியொரு உறவா என்று உடன்பிறப்புகள்
ஆச்சர்யமாகிறார்கள்.
