எதிர்க் கட்சிகள் ஆட்சி செய்யும் மாநிலங்களில் எல்லாம் ஆளுநரைத் தூண்டிவிட்டு அதிகார மோதல் நடப்பது வழக்கமாக நடப்பது தான். பதவிக் காலம் முடிந்த பிறகும் தமிழகத்தில் ஒட்டிக்கொண்டிருக்கும் ஆளுநர் ஆர்.என்.ரவி தமிழக அரசுடன் மோதுவதை முழு நேரத் தொழிலாக வைத்துக்கொண்டு இருக்கிறார். உச்சநீதிமன்றம் குட்டு வைத்த பிறகும் பதவியில் ஒட்டிக்கொண்டு தமிழக அரசுடன் மோதும் ஆளுநருக்கு அவமானம் என்றால் என்னவென்று தெரியுமா என்ற கெள்வி எழுந்துள்ளது.
சமீபத்தில் கல்லூரி மாணவர்களை ஜெய் ஸ்ரீராம் கோஷம் போட வைத்து மிகப்பெரும் சர்ச்சையில் சிக்கினார். இந்த வழியில் இஸ்லாம் தலைவர், ‘அல்லாஹூ அக்பர்’ என்று கல்லூரி மாணவர்களை கோஷமிட வைத்தால் என்னாகும் என்று கேள்வி எழுப்புகிறார்கள்.
ஆளுநருக்கு எதிரான சட்டப் போராட்டத்தில் தமிழ்நாடு மகத்தான வெற்றி பெற்றுள்ளது. தமிழ்நாடு அரசு அனுப்பிய மசோதாக்கள் மீது முடிவெடுக்காமல் ஆளுநர் நிறுத்தி வைத்திருப்பது சட்டவிரோதம். தனியாக முடிவெடுக்கும் அதிகாரம் ஆளுநருக்கு இல்லை. தமிழ்நாடு ஆளுநர் நிறுத்தி வைத்திருந்த 10 மசோதாக்களுக்கும் நாங்களே ஒப்புதல் வழங்குகிறோம். ஆளுநர் அரசியல்வாதி போல் செயல்படக்கூடாது. தமிழ்நாட்டின் பல்கலைக்கழகங்களுக்கு இனி மாண்புமிகு தமிழ்நாடு முதலமைச்சர் அவர்களே வேந்தராக இருப்பார். அரசு அனுப்பும் மசோதாக்களின் மீது 1 மாதம் முதல் 3 மாதங்களுக்குள் இனி ஆளுநர் முடிவெடுக்க வேண்டும் என்றெல்லாம் ஓங்கி ஓங்கி தலையில் குட்டு வைத்திருக்கிறது.
இந்த விவகாரத்தை திசை திருப்பும் வகையில் ஆளுநர் நடத்தும் துணைவேந்தர்கள் மாநாடு சட்ட விரோதமானது என்று கருப்புக்கொடி போராட்டம் நடத்துகிறார்கள். இந்த போராட்டத்தில், ‘உச்ச நீதிமன்றத்தை மதிக்காத ஆளுநரே வெளியேறு ! அதிகாரத் திமிர் பிடித்த ஆளுநரே வெளியேறு ! அடாவடித்தனம் செய்யும் ஆர்.என்.ரவியே வெளியேறு ! தமிழ்நாட்டு அரசுக்கு எதிராக செயல்படும் ஆர்.என்.ரவியே வெளியேறு ! தமிழ்நாட்டை விட்டே வெளியேறு’ என்றெல்லாம் கோஷம் போடுகிறார்கள்.
மானம், மரியாதை இருந்தால் கவர்னர் எப்போதோ ராஜினாமா செய்திருப்பார்.
