மக்களவைத் தேர்தல் நெருங்கும் நேரத்தில் திடீரென இந்தியக் குடியுரிமைத் திருத்தச் சட்டத்தை பா.ஜ.க. அரசு அமல்படுத்தியிருக்கிறது. நம் இந்திய நாட்டில் மட்டுமே ஜாதி, மதம் என மக்களைப் பிரிக்காத குடியுரிமைச் சட்டம் இருக்கிறது. இந்த சட்டத்தில் திருத்தம் செய்திருக்கிறது மத்திய அரசு.
இந்த சட்டத்திருத்தம் அண்டை நாடுகளில் உள்ள அனைத்து இந்துக்களுக்கும் வெளிப்படையாக அழைப்பு கொடுக்கிறது. அதே நேரம் உள்நாட்டில் உள்ள முஸ்லிம்களுக்கு நேரடியான அச்சுறுத்தலையும், அவமானத்தையும் கொடுக்கிறது. இந்த சட்டம் நேரடியாக முஸ்லிம்களுக்கு எதிரானது, இலங்கைத் தமிழ் அகதிகளுக்கு தமிழர்களுக்கு எதிரானது என்று இந்தியா முழுவதும் போராட்டங்கள் நடைபெறத் தொடங்கிவிட்டன.
இப்படிப்பட்ட போராட்டம் தேர்தல் நேரத்தில் நடைபெற வேண்டும் என்பதே ஆளும் பா.ஜ.க.வின் விருப்பமாக இருக்கிறது. தெருவுக்கு வந்து இஸ்லாமியர்கள் போராடுவதால் இந்துக்கள் ஒன்றுபட்டு மீண்டும் பா.ஜ.க.வுக்கு வாக்களிப்பார்கள் என்பதே அவர்களின் எண்ணமாக இருக்கிறது. ஆகவே, மிகச்சரியாக ரமலான் நோன்பு தொடங்கும் தினத்தில் இந்த சட்டம் அமலாகியிருக்கிறது.
