நேற்றைய தினம் கொடநாடு கொலை, கொள்ளை விவகாரம் குறித்து டிடிவி
தினகரன் ஒரு பேட்டி கொடுத்தார். அங்கிருந்த ஆதாரங்களை எல்லாம் நாங்கள் அழித்துவிட்டோம்
என்று கூறியிருந்தார்.
இந்த நிலையில் அவருக்குப் பதிலடி கொடுப்பது போன்று ஆர்.பி. உதயகுமார்
பேசியிருக்கிறார். அதாவது, “உனக்கு என்னப்பா? நீ பைத்தியம் எதை வேணும்னாலும் பேசலாம்
என்பார்கள். அம்மா அவர்கள் 10 ஆண்டு நடவடிக்கை எடுத்ததால் தினகரன் மனநிலை பாதிக்கப்பட்டு
விட்டாரோ என்கிற கவலை அவருடைய தம்பிமார்களான எங்களுக்கு ஏற்பட்டிருக்கிறது.
அம்மா அவரை 10 ஆண்டுகாலம் தனிமைப்படுத்தி வைத்திருந்தார். அவரோடு
உடன்பிறக்கவில்லையே என்ற கவலை எங்களுக்கு இருக்கிறது. அவருடைய தம்பிமார்களான எங்களுக்கு,
அவரது மனநலம் பாதிக்கப்பட்டு பொதுவாழ்க்கையில் இப்படி ஒரு நிலை அவருக்கு ஏற்பட்டு விட்டதே
என்ற கவலை ஏற்பட்டுள்ளது.
கோடநாடு வழக்கைப் பற்றி அவர் பேசியிருக்கிறார். கோடநாடு வழக்கில்
எடப்பாடி பழனிசாமி முதல்வராக இருந்தபோது சட்ட ரீதியான நடவடிக்கைகள் எடுக்கப்பட்டன.
அதுகுறித்து சட்டமன்றத்தில் நீண்ட விவாதம் நடந்து அது சட்டசபையில் விவாதிக்கப்பட்டுள்ளது.
இவர் சட்டசபைக்கு தேர்ந்தெடுக்கப்படாலும், உள்ளே இருப்பதில்லை. சட்டமன்ற பதிவுகளை படித்துவிட்டு
அவர் பேச வேண்டும். எம்.எல்.ஏக்களை பற்றி, அமைச்சர்களை பற்றி உளவுத் துறை கொடுத்த தகவல்களை
கிழித்துப் போட்டதாக அவர் சொல்கிறார்.
எவ்வளவு கீழ்த்தரமான, சிறுமைப்படுத்தும் எண்னம் இது. அவலே இல்லாமல்
வெறும் வாயை மெல்பவர் இவர். இப்போது எல்லாவற்றையும் கிழித்துவிட்டதாக சொல்கிறார். பொதுவெளியில்
எதை வேண்டுமானாலும் பேசிவிடலாமா? இது என்ன நியாயம்?’’ என்று கேள்வி எழுப்பியிருக்கிறார்.
இதையடுத்து இன்று ஆர்.பி.உதயகுமாருக்கு டிடிவி தினகரன் கடுமையான
பதிலடி கொடுப்பார் என்கிறார்கள். என்ன நடக்கிறது என்று பார்க்கலாம்.
