தமிழ்நாடு உள்ளிட்ட 12 மாநில, யூனியன் பிரதேசங்களில் வாக்காளர்
சிறப்பு தீவிர திருத்த நடவடிக்கை இன்றுமுதல் மேற்கொள்ளப்பட இருப்பதாக தலைமை தேர்தல்
ஆணையம் தெரிவித்துள்ள விவகாரம் தமிழகத்தில் பெரும் அதிர்ச்சியலைகளை ஏற்படுத்தியிருக்கிறது.
திமுக கடும் எதிர்ப்பு தெரிவித்திருக்கும் நிலையில் அதிமுக ஆதரவு தெரிவிப்பது நிலவரத்தை
சூடாக்கியுள்ளது
பீகாரில் எஸ்.ஐ.ஆர். எனும் வாக்காளர் பட்டியல் சிறப்பு தீவிர திருத்த
பணி நடைபெற்றபோது, லட்சக்கணக்கிலான வாக்காளர்கள் நீக்கப்பட்டதாக கடும் எதிர்ப்பை எதிர்க்கட்சிகள்
தெரிவித்தன. இந்நிலையில், தமிழ்நாடு உள்பட 12 மாநில, யூனியன் பிரதேசங்களில் எஸ்ஐஆர்
நடவடிக்கை தொடங்கும் என அறிவிக்கப்பட்டுள்ளது.
இது தொடர்பாக, டெல்லியில் செய்தியாளர்களை சந்தித்த தலைமை தேர்தல்
ஆணையர் ஞானேஷ்குமார், ‘’பீகாரில் நடைபெற்ற வாக்காளர் பட்டியல் சிறப்பு தீவிர திருத்தம்
தொடர்பாக ஒரு புகார் கூட வரவில்லை. இப்போது தமிழ்நாடு, கேரளா, மேற்கு வங்கம், மத்திய
பிரதேசம், உத்தர பிரதேசம், குஜராத், ராஜஸ்தான், சத்தீஸ்கர், கோவா மற்றும் யூனியன் பிரதேசங்களான
புதுச்சேரி, அந்தமான், நிகோபார் தீவுகள், லட்சத்தீவில் சிறப்பு தீவிர திருத்தம் நடைபெற
உள்ளது’’ என்று தெரிவித்தார்.
இதுகுறித்து திமுகவினர், ‘’பீகாரில் SIR நடத்தப்பட்டபோது, தேர்தல்
ஆணையத்தின் சூழ்ச்சி நாடு முழுவதும் வெளிச்சமிட்டது. உச்ச நீதிமன்றமே கூட இதுகுறித்து
தேர்தல் ஆணையத்தை கடுமையாக கண்டித்தது. நாடு முழுவதும் “வாக்கு திருட்டு” பல வடிவங்களில்
வெளிப்படுகிறது. சில இடங்களில் திட்டமிட்டவாறு வாக்குகள் சேர்க்கப்படுகின்றன; சில இடங்களில்
திட்டமிட்டவாறு நீக்கப்படுகின்றன. 12 மாநிலங்களில் நடத்தப்படும் SIR ஜனநாயகத்திற்கு
எதிரான – மக்களின் உரிமைகளைப் பறிக்கும் ஒரு சதி’’ என்கிறார்கள்.
நாம் தமிழர் சீமான், ‘’தமிழ்நாட்டில் இருக்கும் பரம்பரை ஜாதி மக்களை
சிறுபான்மையினர் ஆக்கிவிட்டு வட மாநிலத்தவர்களை இங்கு ஆதிக்கம் செலுத்துவதற்காகவே இந்த
சட்டத்திருத்தம் நடைபெறுகிறது. வட மாநிலத்தவர் ஓட்டு எல்லாமே பாஜகவுக்கே போய்ச் சேரப்போகிறது.
அவர்கள் மொழியால் ஒன்றாக நின்று ஓட்டு போடுவார்கள் இந்த வாக்குகளை தடுக்கவில்லை என்றால்
தமிழகத்தின் நிலை மாறிவிடும்’’ என்று எச்சரிக்கை செய்திருக்கிறார்.
இந்நிலையில் அதிமுக மட்டும் இந்த திருத்தத்தை ஆதரித்திருப்பது
கடும் சர்ச்சையாகிவருகிறது. இது தொடர்பாக ஸ்டாலின் வரும் நவம்பர் 2ம் தேதி அனைத்துக்
கட்சி கூட்டத்துக்கு அழைப்பு விடுத்திருக்கிறார். என்ன மாற்றம் நிகழும் என்று பார்க்கலாம்.
