கரூர் நெரிசலில் சிக்கி உயிரிழந்த 37 குடும்பத்தில் இருந்து
235 பேரை நேரில் மகாபலிபுரத்துக்கு வரவழைத்து ஆறுதல் கூறினார் நடிகர் விஜய். ஒவ்வொரு
குடும்பத்தினருக்கும் 5 நிமிடம் கால்ஷீட் கொடுத்து தனித்தனியாகப் பேசியிருக்கிறார்.
ஒரு குடும்பத்தில் ஆள் மாறாட்டம் நடந்திருப்பதாக சர்ச்சை எழுந்துள்ளது.
ஏற்கெனவே உயிரிழந்த 39 குடும்பத்தினருக்கு தலா 20 லட்சம் ரூபாய்
கொடுத்திருக்கிறார் நடிகர் விஜய். இந்த நிலையில் நேற்று ஒவ்வொரு குடும்பத்தலைவரின்
பெயரில் 5 லட்சம் ரூபாய் வைப்பு தொகை கொடுத்து, அதன் ரசீது சான்றிதழ் வழங்கினார். அதோடு
37 குடும்பங்களுக்கும் 5 லட்சம் ரூபாய்க்கு மருத்துவ காப்பீடு வழங்கியதாகவும் கூறப்படுகிறது.
விஜய்யைப் பார்த்ததும் பாதிக்கப்பட்ட குடும்பத்தினர் கண்ணீர் விட்டு
நெகிழ்ச்சி அடைந்தனர். அனைவருக்கும் தைரியம் கொடுத்திருக்கும் விஜய், கடைசி வரை உங்களுக்கு
பாதுகாப்பாக இருப்பேன் என்று உறுதி கொடுத்திருக்கிறார்.
இந்த நிலையில் சங்கவி என்பவ்ர் ஒரு சர்ச்சையை எழுப்பியிருக்கிறார்.
அதாவது கரூர் நெரிசலில் உயிரிழந்தவர்களில் ஒருவரான கோடங்கிபட்டியைச் சேர்ந்த ரமேஷ்
என்பவரின் மனைவி சங்கவி. விஜய் வழங்கிய ரூ.20 லட்சம் நிதி சங்கவியின் வங்கிக் கணக்கில்
சேர்க்கப்பட்டது. ஆனால், ஆறுதல் நிகழ்ச்சிக்கு சங்கவியை அழைக்காமல் அவரது உறவினரை அழைத்துச்சென்றனர்.
இதுகுறித்து பேசிய சங்கவி, ‘’கரூர் நெரிசலில் என் கணவன் ரமேஷ்
உயிரிழந்தார். விஜய் அவர்களால் வழங்கப்பட்ட உதவி தொகைக்கு நன்றி. ஆனால், நான் தான்
என் கணவனை இழந்தவன். எனக்குப் பதிலாக என் உறவினரை சென்னைக்கு அழைத்துச் சென்று விஜய்
சந்தித்தது தவறு. அதனால் விஜய் வழங்கிய ரூ.20 லட்சத்தை திருப்பி அனுப்பிவிட்டேன். பணம்
எனக்கு முக்கியமல்ல; மரியாதை தான் முக்கியம்,” என கோபப்பட்டுள்ளார்.
சங்கவியை தனியே விஜய்யை சந்திக்க வைக்கும் முயற்சிகள் நடைபெற்றுவருகின்றன.
