உதயநிதி பிறந்த நாளை காலி செய்த விஜய்.. ஜனநாயகன் Vs நிஜநாயகன் 

இன்று உதயநிதியின் பிறந்த நாள். இதை கொண்டாட திமுகவினர் தீயாக வேலை செய்துவந்தனர். திமுக ஐடி விங் சார்பில், ‘கழகத் தலைவரின் திராவிட மாடல் அரசுக்குத் தூணாய் துணை நிற்கும் துணை முதலமைச்சர், அறிவுத் திருவிழா நடத்திய ஆற்றல்மிக்க இளம் தலைவர், கருத்தியல் களங்களில் கொள்கை வீரர்களைத் தயார் செய்யும் கழக இளைஞர் அணிச்செயலாளர், உதயநிதிக்கு 49-வது பிறந்தநாள் வாழ்த்துகள் தெரிவித்து வணங்கி மகிழ்கிறோம்…’’ என்று கொண்டாட்ட அறிவிப்பு வெளியிட்டார்கள்.

தமிழகமெங்கும் ஜனநாயகனுக்கும் நிஜநாயகனுக்கும் போட்டி என்று எக்கச்சக்க போஸ்டர் ஒட்டினார்கள். இன்றைய நாள் முழுவதும் உதயநிதி கொண்டாட்டம் தமிழகம் முழுக்க நடக்கவேண்டும் என்று திட்டமிட்டனர். ஆனால், விஜய் கட்சியில் செங்கோட்டையன் இணைந்த செய்தி காரணமாக யாரும் உதயநிதி பற்றி கொஞ்சமும் கண்டுகொள்ளவே இல்லை.

இந்த நிலையில், உதயநிதி ஸ்டாலினின் பிறந்த நாளை முன்னிட்டு, முரசொலி 152 பக்க சிறப்பு மலர் வெளியிட்டுள்ளது. இன்றைய நாளை மனித நேய உதய நாள், எளியோர் எழுச்சி நாள் என்று கொண்டாடுகிறார்கள்.  

இதற்கு அதிமுகவினர், ‘’உதயநிதிக்கும் மனித நேயத்துக்கும் என்ன சம்பந்தம் என்றுதான் தெரியவில்லை. கரூரில் ஏற்பட்ட நெரிசலில், பலர் உயிரிழந்த நிலையில், வெளிநாட்டில் தனது உல்லாச பயணத்துக்கு ஒரு நாள் மட்டும் பிரேக் விட்டு விமானத்தில் வந்து அஞ்சலி செலுத்திய வேகத்திலேயே திரும்பிச் சென்றதுதான் மனித நேயமா?

ரேபீஸ் நோயால் பாதிக்கப்பட்டவர்களின் எண்ணிக்கையில் தமிழகம் முதல் இடத்தில் இருக்க, நாய்க்கடியால் பலரும் அவதிப்பட,  அதைப் பற்றியெல்லாம் கவலைப்படாமல், தன் செல்ல நாய்க்குட்டியுடன் விளையாடும் படங்களை சமூக வலைதளங்களில் ‘ரவுடி டைம்’ என்று போடுவதுதான்  மனித நேயமா?

விவசாயிகள் பாடுபட்டு உற்பத்தி செய்த நெல்மணிகளை உடனடியாக கொள்முதல் செய்ய, ஒரு துணை முதல்வராக  நடவடிக்கை எடுக்காமல் அவர்களை களத்துக்கு சென்றுகூட சந்திக்க நேரம் இல்லாமல், விவசாயிகள் கண்ணீரில் வாடும்போது  சினிமா நிகழ்ச்சிகளுக்கு மட்டும் நேரம் ஒதுக்குவதுதான் மனித நேயமா?

பெண்களுக்கு எதிரான வன்கொடுமைகள் அதிகமாகி, அவர்கள் பாதிக்கப்படும் நிலையில், அதில் ஈடுபடும் கட்சிக்காரர்களுக்கு அரணாக நிற்பதுதான் மனித நேயமா?’’ என்று கேள்வி எழுப்புகிறார்கள்.