தேர்தல் நேரத்தில் மட்டும் காங்கிரஸ் கட்சித் தலைவர்களுக்கு திடீர்
ரோஷம் வரும். அதிக சீட், ஆட்சியில் பங்கு என்று கொதிப்பார்கள். கூட்டணி பேச்சுவார்த்தை
தொடங்கும்போது, டெல்லியில் இருந்து உத்தரவு வந்ததும் கப்சிப் என்று மாறிவிடுவார்கள்.
ஆனால், இந்த முறை அப்படி நடக்காது, விஜய்யுடன் கூட்டணி உறுதி என்று
காங்கிரஸ் கட்சியினர் தீவிரம் காட்டிவருகிறார்கள். இதுகுறித்து பேசும் காங்கிரஸ் தலைவர்கள்,
‘’தவெக – காங்கிரஸ் கூட்டணியை இயற்கை கூட்டணியாக பார்க்கிறார்கள். ராகுல் காந்தியும்
விஜய் அவர்களும். தமிழ்நாட்டில் மட்டுமில்ல புதுச்சேரி,கேரளா, கர்நாடகா, ஆந்திரா தென்னிந்திய
முழுவதையும் இந்த கூட்டணியை வைத்து பலம் பெற முடியும் என்று காங்கிரஸ் தலைமை உறுதியுடன்
நம்புகிறது.
அதனாலே கரூர் சம்பவத்தை அடுத்து ராகுல் காந்தி பேசி ஆறுதல் கூறினார்.
அதேபோல் பிரியங்கா காந்தியும் பேசியிருக்கிறார். இந்த கூட்டணி அமைந்தால் சூப்பர் ஹிட்
அடிக்கும்’’ என்கிறார்கள்.
இதுகுறித்து தவெகவில் விசாரித்தபோது, ‘’அதிமுகவுடன் தவெக கூட்டணிப்
பேச்சில் இருக்கிறது என்கிற செய்தி வெளியானது. ஆனால், இதை மறுத்து தலைமை அறிக்கை வெளியிட்டது.
இதையடுத்து தவெக, காங்கிரசுடன் பேச்சுவார்த்தை என்று கடந்த சில நாள்களாக தொடர்ந்து
செய்தி வெளியாகிக் கொண்டிருக்கிறது. ஆனால், இதை தவெக அமைதியாக வேடிக்கை பார்க்கிறது.
அப்படியென்றால் இது உண்மை என்றே அர்த்தம்’’ என்கிறார்கள்.
ஆனால் திமுகவினரோ, ‘’காங்கிரஸ் கட்சியின் லோக்கல் தலைவர்கள் பேசுவதை
நாங்கள் கண்டுகொள்வதே இல்லை. சோனியா, ராகுல்காந்தி, பிரியங்காவுடன் எங்களுக்கு இருக்கும்
நெருக்கத்தை யாரும் அறிய மாட்டார்கள். காங்கிரஸ் கட்சி காலம் முழுக்க எங்கள் அடிமைக்
கட்சியாகவே இருக்கும்’’ என்கிறார்கள்.
நன்றாகவே நடக்கிறது அரசியல் நாடகம்.
