தர்மயுத்தம் நடத்திய பிறகு தள்ளாட ஆரம்பித்த ஓபிஎஸ் இன்னமும் உருப்படியாக
எந்த முடிவும் எடுக்கவில்லை. கட்சிக் கரை வேட்டி கட்டமுடியாத நிலையில் இருக்கிறார்.
இந்த நிலையில் வரும் தேர்தலை முன்னிட்டு புதிய கட்சி உதயமாகும் வாய்ப்பு உருவாகியுள்ளது.
அதிமுகவில் இருந்து நீக்கப்பட்ட முன்னாள் முதலமைச்சர் ஓ. பன்னீர்செல்வம்
தலைமையில் ஆலோசனைக் கூட்டம் நேற்று சென்னை வேப்பேரியில் நடைபெற்றது. இந்த ஆலோசனைக்
கூட்டத்தில், உரிமை மீட்பு குழு இன்று முதல் அதிமுக தொண்டர்கள் உரிமை மீட்பு கழகமாக
செயல்படும் எனத் தீர்மானம் நிறைவேற்றப்பட்டது.
இதையடுத்து பேசிய ஓபிஎஸ், “அதிமுக ஒருங்கிணைய இன்னும் ஒரு மாதம்
கெடு. அப்படி ஒரு மாதத்தில் அதிமுக இணையாவிட்டால் டிசம்பர் 15ஆம் தேதி மீண்டும் கூடி
முக்கிய முடிவு எடுக்கப்படும். தொடர் தோல்வி, தவறான பொதுக்குழுவால் மக்கள் நம்பிக்கையை
அதிமுக இழந்துவிட்டது” எனத் தெரிவித்தார்.
அதேபோல் வைத்திலிங்கம், “அதிமுக ஒருங்கிணைய வேண்டும் என கடந்த
மூன்றரை வருடங்களாக முன்னாள் முதலமைச்சர் ஓ. பன்னீர்செல்வம் அமைதியாக அமைதி புரட்சி
நடத்திக் கொண்டிருந்தார். இன்னும் ஒரு மாதத்தில் அதிமுக ஒன்றிணையாவிட்டால், ஒரு வியூகத்தை
அமைத்து, ஓ. பன்னீர்செல்வத்தின் உரிமை மீட்பு குழு, கழகமாக மாறி மாபெரும் வெற்றியை
பெறும். நமக்கு இடையூறாக இருக்கும் அந்தத் தீய சக்தியை விரட்டி அடிப்பதுதான் நமது ஒரே
நோக்கமாக இருக்கும். ஒற்றுமையாக இருங்கள்” எனத் தெரிவித்தார்.
இதையடுத்து பன்னீர் புதிய கட்சி தொடங்கப்போவதும், அந்த புதிய கட்சியுடன்
என்.டி.ஏ. அல்லது விஜய் கூட்டணியில் இணைவதும் உறுதியாகிவிட்டது. இந்த நெருக்கடியை எடப்பாடி
எப்படி எதிர்கொள்ளப் போகிறார். தென் மாவட்டங்களில் அதிமுகவின் வாக்குகளை கண்டிப்பாக
சிதறடிக்கும் என்பதால், புதிய வியூகம் வகுக்க வேண்டிய கட்டாயம் எடப்பாடிக்கு நேர்ந்திருக்கிறது.
என்ன செய்யப்போகிறார் எடப்பாடி..?
