பிரதமர் நரேந்திர மோடி அறிமுகம் செய்திருக்கும் புதிய சட்டம் வாரத்திற்கு 48 மணி நேரம் தான் சொல்கிறது, ஆனால் ஒரு நாளில் 12 மணி வேலை செய்யலாம் என்று கூறியிருப்பதால்
தொழிலாளர்களுக்கு பெரும் அச்சத்தைக் கொடுத்துள்ளது.
இது குறித்து மோடி, ‘’இன்று, நமது அரசாங்கம் நான்கு தொழிலாளர்
குறியீடுகளை நடைமுறைப்படுத்தியுள்ளது. இது சுதந்திரத்திற்குப் பிறகு மிகவும் விரிவான
மற்றும் முற்போக்கான தொழிலாளர் சார்ந்த சீர்திருத்தங்களில் ஒன்றாகும். இது நமது தொழிலாளர்களுக்கு
பெரிதும் அதிகாரம் அளிக்கிறது. இது இணக்கத்தை கணிசமாக எளிதாக்குகிறது மற்றும் ‘வணிகம்
செய்வதை எளிதாக்குகிறது’ என்பதை ஊக்குவிக்கிறது
இந்த குறியீடுகள் உலகளாவிய சமூகப் பாதுகாப்பு, குறைந்தபட்ச மற்றும்
சரியான நேரத்தில் ஊதியம் வழங்குதல், பாதுகாப்பான பணியிடங்கள் மற்றும் நமது மக்களுக்கு,
குறிப்பாக நாரி (பெண்கள்) சக்தி மற்றும் யுவ (இளைஞர்) சக்திக்கு ஊதிய வாய்ப்புகளுக்கான
வலுவான அடித்தளமாக செயல்படும்.
இது தொழிலாளர்களின் உரிமைகளைப் பாதுகாக்கும் மற்றும் இந்தியாவின்
பொருளாதார வளர்ச்சியை வலுப்படுத்தும் எதிர்காலத்திற்குத் தயாராக இருக்கும் சுற்றுச்சூழல்
அமைப்பை உருவாக்கும். இந்த சீர்திருத்தங்கள் வேலை உருவாக்கத்தை அதிகரிக்கும், உற்பத்தித்திறனை
அதிகரிக்கும் மற்றும் விக்ஸித் பாரத் (வளர்ந்த இந்தியா) நோக்கிய நமது பயணத்தை துரிதப்படுத்தும்…’’
என்று கூறியிருக்கிறார்.
ஆனால் காங்கிரஸ் கட்சியினர், ‘’இன்று நாடு முழுவதும் கட்டாயமாக
அமலாக்கப்பட்டுள்ள புதிய தொழிலாளர் சட்டங்கள், தொழிலாளர்களின் நலனையும் மனிதநேய உரிமைகளையும்
நேரடியாக புறக்கணிக்கும் முடிவாகும்.
8 மணி நேர வேலை நேரம் என்பது ஒரு சாதாரண விதிமுறை அல்ல; தலைமுறைகள்
கடந்து நடந்த ரத்தத்தும் உயிர் தியாகங்களும் கொண்ட போராட்டங்களின் பயனாக உருவான வரலாற்றுச்
சாதனை. தொழிலாளர்களின் உடல்நலம், குடும்ப நேரம், சமூக வாழ்வு இவை அனைத்தையும் காக்கும்
மனிதநேய உரிமையாக இதை உறுதி செய்தவர் புரட்சியாளர் டாக்டர் பாபாசாகேப் அம்பேத்கர்.
‘தொழிலாளர் ஒரு மனிதன்; இயந்திரம் அல்ல’ என்ற அவரின் உயர்ந்த கொள்கையின்
அடிப்படையில் நாடு முழுவதும் 8 மணி நேர வேலை நேரம் என்பது சட்டமாக கொண்டுவரப்பட்டது.
அந்த உரிமையை 12 மணிநேரமாக நீட்டிக்க முயல்வது தொழிலாளரின் ரத்தத்தை உறிஞ்சும் கொடூரமான
முடிவு.
மேலும், தொழிலாளர்களை பாதுகாக்க உருவாக்கப்பட்ட 29 முக்கியமான
சட்டங்களை ஒரே அடியில் களைந்து 4 சட்டங்களாகச் சுருக்கும் நடவடிக்கை, தொழிலாளர் வர்க்கத்தின்
குரலையும் பாதுகாப்பையும் பறிக்கும் செயலாகும். இந்த மாற்றங்கள் தொழிலாளர்களுக்காக
அல்ல; நாட்டின் பெருஞ்செல்வத்தை தன் வசம் வைத்துள்ள பிரதமர் மோடியின் நெருங்கிய நண்பர்களான
அம்பானிக்கும், அதானிக்கும் திட்டமிட்டு கொண்டு வரப்படுகின்றன…’’ என்று போராட்டத்தை
அறிவிக்கின்றனர்.
மோடி பின்வாங்க வாய்ப்பே இல்லை என்பதே நிஜம்.
