துரை வைகோ கட்சிக்குள் வந்ததில் இருந்தே மல்லை சத்யாவுடன் பஞ்சாயத்து
இருந்துவந்தது. இதனை சரிசெய்வதற்கு வைகோ எத்தனையோ முயற்சிகள் மேற்கொண்டும் அது முடியவே
இல்லை. எனவே, கட்சியில் இருந்து வெளியேற்றப்பட்டார்.
விரைவில் தனிக்கட்சி தொடங்கும் முடிவில் இருக்கும் மல்லை சத்யா
நேற்றைய தினம் முதன்முறையாக வைகோ பற்றிய ரகசியங்களை செய்தியாளர்களிடம் பேசினார். அப்போது
அவர், ‘செங்கல்பட்டு மாவட்டத்தில் மட்டும் ரூ.250 கோடிக்கு வைகோ குடும்பத்துக்கு சொத்து
இருக்கிறது. அவரது உறவினர்கள் நடத்தும் மதுபான ஆலைகளால், அவருக்கு கோடிக்கணக்கில் வருமானம்
வருகிறது. அதை வைத்து தான் வீட்டை அவர் கட்டியிருக்கிறார்.
ரூ.5 கோடி மதிப்பில் மிகப்பெரிய நட்சத்திர விடுதியை பல ஆண்டுகளுக்கு
முன்னர் வாங்கினார். தற்போது செங்கல்பட்டு மாவட்டத்தில் 10 கிரவுண்டில் மிகப்பெரிய
அரண்மனை போன்ற வீட்டை கட்டியிருக்கிறார்.
அரண்மனை போன்ற வீடு குறித்த செய்தி வெளியே வரக்கூடாது என ரகசியமாக
புதுமனை புகு விழா நடத்தினார். வைகோ உறவினர் மதுபான ஆலை நடத்தி வரும் நிலையில், மதுவிற்கு
எதிராக வைகோ நடைபயணம் செல்கிறார். துரை வைகோவிற்கு மத்திய அமைச்சர் ஆக வேண்டும் என்கிற
எண்ணம் உள்ளது. அதனால் பாஜகவுடன் இணைந்து செயல்பட நினைக்கிறார் வைகோ.
ராமதாஸ், அன்புமணியை ஏன் கட்சிக்கு அழைத்து வந்தோம் என வருத்தப்படுகிறார்.
அதே போல் ஒரு நாள் வைகோவும் வருத்தப்படுவார். சரியான நேரத்தில் தவறான முடிவு எடுத்தவர்
வைகோ.
1998ல் மதிமுகவுக்கு நாடாளுமன்ற வாசலைத் திறந்து வைத்தது அதிமுக
தான். அதிமுகவுடனான கூட்டணி தர்மத்தை மீறி வாஜ்பாய் அரசுக்கு தார்மீக ஆதரவு தந்ததால்
அதிமுகவின் கோபத்தைப் பெற்றது.
கடந்த 2016 சட்டப்பேரவைத் தேர்தலில் மக்கள் நலக் கூட்டணி உருவானதில்
பல ரகசியங்கள் இருக்கின்றன. அதை இப்போது சொல்ல முடியாது. சரியான நேரத்தில் தவறான முடிவு
எடுத்தவர் வைகோ என்ற விமர்சனம் சரியானது. மதிமுகவில் இருந்து நீக்கப்பட்ட நாங்கள் சென்னை
அடையாறில் வரும் 20ம் தேதி புதிய கட்சியை தொடங்க உள்ளோம். திராவிட இயக்க கருத்தியலில்
இருந்து பின் வாங்கக்கூடாது என்பதில் உறுதியாக உள்ளோம். மதவாத சக்திகள் வலுப்பெற கூடாது
என்பதை கருத்தில் கொண்டு திமுக கூட்டணிக்கு ஆதரவு அளித்து வருகிறோம்” என்று கூறியிருக்கிறார்.
இதற்கு பதிலளித்துள்ள வைகோ, ‘’என்னுடைய நேர்மையை உலகமே அறியும்.
ஆலகால விஷத்தை கக்கும் நச்சுப்பாம்பு மல்லை சத்யா. எனது அரசியல் விரோதிகள்கூட சொல்லத்
துணியாத குற்றச்சாட்டைக் கூறியிருக்கிறார். மல்லை சத்யாவின் குற்றச்சாட்டு ஜமுக்காளத்தில்
வடிகட்டிய பொய்’ என்று கூறியிருக்கிறார்.
நெருப்பில்லாமல் புகையுமா என்று மதிமுகவினரே கேள்வி எழுப்புகிறார்கள்.
