திமுகவின் ரவுடித்தனம் திருமாவளவனுக்கும் வந்திடுச்சா..? நடுரோட்டில் வன்முறை களேபரம்

பிரியாணி கடை தொடங்கி திமுகவினர் செல்லும் இடமெல்லாம் வன்முறை தாண்டவமாடுவது வழக்கம். அதே வழியில் திருமாவளவனும் அடிதடியை ஆதரிக்கிறாரோ என்பது போன்ற சம்பவங்கள் நடந்தேறியிருக்கின்றன.

சென்னை நந்தம்பாக்கம் 158வது வட்ட அதிமுக கழக செயலாளரும், வழக்கறிஞருமான ராஜீவ்காந்தியின் ஸ்கூட்டர் நேற்று விசிக தலைவர் கார் மீது லேசாக மோதியதாக சொல்லப்படுகிறது. இதற்கு திருமாவளவன் கண் முன்பு உயர்நீதிமன்ற வாசலில் தாக்குதல் நடத்தியுள்ளனர். சிறு விபத்தை பெரிதுபடுத்தி சட்டம் ஒழுங்கிற்கே நீதிமன்ற வாயிலிலேயே சவால் விட்டுள்ளனர்.

இதையெல்லாம் காருக்குள் இருந்தபடி வேடிக்கை பார்த்திருக்கிறார் திருமாவளவன். தன் தொண்டர்களின் அராஜகத்தை நேரில் கண்டும் காரில் இருந்து இறங்கி சூழ்நிலையை தணிக்காமல் அமைதியாக இருந்துள்ளார்.

திமுகவின் கூட்டணிக் கட்சி என்பதால் திருமாவளவனுக்கும் அதே வன்முறை புத்தி வந்துவிட்டதா என்ற சந்தேகம் எழுகிறது.

இந்த நிலையில், நடந்த சம்பவத்துக்கு ஒரு விளக்கம் கொடுத்திருக்கிறார். அதாவது, ‘’என் வண்டிக்கு முன்னால் இடதுபுறமாக ஒரு இளைஞர் சென்றுகொண்டு இருந்தார்.  ஆனால் வேகமாக போகவில்லை. வேண்டுமென்றே மிக தாமதப்படுத்தி வண்டியை ஓட்டிக்கொண்டு போகிறார். இடையில் ஸ்பீட் ப்ரேக் அருகில் அவர் வண்டியை நிறுத்தினார். என்னுடைய ஓட்டுநர் வழக்கம்போல ஹார்ன் அடித்தார். பின்னால் வந்த எஸ்கார்ட் போலீஸாரும் சைரன் ஒலியை எழுப்பினார்கள்.

எங்கள் வண்டி அவர் மீது மோதவில்லை. அவர் வண்டியை நிறுத்திவிட்டு எங்கள் அருகில் முறைத்துக்கொண்டு வந்து சத்தம் போட்டார். இதைப்பார்த்த எஸ்கார்ட் போலீஸ், அவர் வம்பு இழுக்கிறார் என்று உணர்ந்து காரில் இருந்து இறங்கி அவரை தள்ளிச் செல்லுமாறு கூறினார்கள். ஆனால் அவர்களை பார்த்தும், காரில் நான் அமர்ந்திருப்பதை பார்த்தும் வேண்டுமென்றே வம்பு இழுக்கும் மனநிலையில் பேசிக்கொண்டு இருந்தார்.

எங்கள் கட்சித் தொண்டர்கள் அவரை ஓரமாக நிற்கச் சொல்லி இருக்கிறார்கள். அவர்களிடமும் அவர் வேகமாக பேசியிருக்கிறார். இந்த நிலையில்தான் காவல் துறையினரும் இயக்கத் தோழர்களும் அவரை தள்ளுகிறபோது தள்ளுமுள்ளு ஏற்பட்டுள்ளது. அவர் எதிர்த்துப்  பேசியதால் தொண்டர்கள் அவரை அடிக்க கை ஓங்கியிருக்கிறார்கள். அதற்குள் போலீஸார் அவரை அங்கிருந்து அழைத்துச் சென்றுவிட்டனர்.

எங்கள் வண்டி அவர் வண்டியின் மீது மோதவில்லை. அவர் வண்டியும் எங்கள் வண்டிமீது மோதவில்லை. விபத்து என்று சொல்லத்தக்க வகையில் எதுவும் நடக்கவில்லை. ஆனால் சிலர் விபத்து என்கிறார்கள். சிலர் அவர் வண்டியில் எங்கள் கார் மோதியது என்று சொல்வது தவறான தகவல் என்கிறார்.

காரில் இருந்து இறங்கி சமாதானம் செய்வதற்கு திருமாவுக்கு ஏன் மனம் இல்லை..? திருமாவுக்கு வந்தால் அது தக்காளி சட்னியா?