தர்மபுரியில் நடந்த பாமக பொதுக்குழு கூட்டத்தில், தனது மகள் காந்திமதியை,
கட்சியின் செயல் தலைவராக ராமதாஸ் அறிவித்த விவகாரம் பாமக நிர்வாகிகளிடையே கடும் அதிர்ச்சியை
ஏற்படுத்தியிருக்கிறது. தன் குடும்பத்துக்குள் கை மாற்றுவதற்கு பாமக என்ன தனிக்குடும்பத்து
சொத்தா என்ற கேள்வியை பாட்டாளிகள் கேட்கிறார்கள்.
பாமகவில் வெளிப்படையான பிரச்னை விழுப்புரம் மாநாட்டில் வெளிப்பட்டது.
அப்போது பாமக இளைஞர் சங்க தலைவராக தனது மூத்த மகள் காந்தியின் மகன் முகுந்தனை ராமதாஸ்
அறிவித்தார். அதற்கு கடும் எதிர்ப்பு தெரிவித்து அன்புமணி மைக்கை தூக்கிப்போட்டார்.
இதனால் ஆத்திரம் அடைந்த ராமதாஸ், இது என்னோட கட்சி, நான் சொல்வதை கேட்பவர்கள் இங்கே
இருக்கலாம், பிடிக்காதவர்கள் வெளியேறி விடலாம் என மேடையிலேயே பகிரங்கமாக அறிவித்தார்.
உடனே அன்புமணி பனையூரில் தனி அலுவலகம் தொடங்கினார். அதை கண்டுகொள்ளாமல்
அன்புமணி ஆதரவு நிர்வாகிகளை நீக்கிவிட்டு புதிய மாவட்ட செயலாளர்கள், தலைவர்கள், நிர்வாகிகளை
ராமதாஸ் அறிவித்தார். அதோடு, அன்புமணியிடம் இருந்த பாமக தலைவர் பதவியை பறித்த ராமதாஸ்,
அவரை செயல் தலைவராக அறிவித்து, இனி நானே தலைவராக இருப்பேன் என்றார்.
அதோடு ன்னுடைய இனிஷியலை மட்டும் அன்புமணி பயன்படுத்தலாம் என்றும்,
வேறு எந்த உரிமையும் அவருக்கு இல்லை, அவர் கட்சியில் இருந்தே நீக்கப்படுகிறார் என்றும்
ராமதாஸ் அறிவித்து மகள் காந்திக்கு பாமக கூட்டங்கள், நிகழ்ச்சிகளில் மேடையில் ஏற்றி
முக்கியத்துவம் கொடுத்து வந்தார்.
இந்த நிலையில், தர்மபுரியில் ஒருங்கிணைந்த பாமக பொதுக்குழு கூட்டம்
நேற்று நடந்தது. கூட்டத்திற்கு கவுரவத் தலைவர் ஜி.கே.மணி எம்எல்ஏ தலைமை வகித்தார்.
இதில் பாமக நிறுவனத் தலைவர் ராமதாஸ், பாட்டாளி இளைஞர் சங்கத்தலைவராக ஜி.கே.எம்.தமிழ்க்குமரனை
அறிமுகப்படுத்தினார்.
அடுத்து, இந்த மண்ணில், ஒரு புதிய அறிவிப்பு அறிவிக்கிறேன். செயல்தலைவர்
என்ற பொறுப்பை உருவாக்கினேன். தனக்கு தகுதி இல்லை என்று ஒருவர் கூறி, அதை வேண்டாம்
என்று கூறி விட்டார். அதனால், செயல்தலைவர் பொறுப்பை என்னுடைய பெரிய மகள் காந்திக்கு
அளித்துள்ளேன். அவர் கட்சிக்கும், எனக்கும் பாதுகாப்பாக இருப்பார்..’’ என்று அறிவித்தார்.
.குடும்ப அரசியலுக்கு எதிராக பொங்கியெழுந்த ராமதாஸ் இப்போது குடும்ப
உறுப்பினர்களை மையப்படுத்தியே செயல்படுவது கடும் சர்ச்சையை உருவாக்கியுள்ளது. இந்த விஷயத்துக்கு இது வரையிலும் அன்புமணி எந்த பதிலும்
சொல்லவில்லை என்றாலும் உச்சபட்ச கோபத்தில் இருக்கிறார்.
இதையடுத்து பேசிய காந்திமதி, ‘அய்யாவால் அடையாளம் காட்டப்பட்டு,
அரசியலில் பதவி பெற்றவர்கள், நெஞ்சின் மீது ஏறி மிதித்து, துரோகம் இழைத்தவர்களை கூட
தாங்கி, வெற்றி பெறும் காலம் விரைவில் வரப்போகிறது. அவரது மகளாக இல்லாமல், ஒரு படி
மேலே போய், உங்களில் ஒரு தொண்டனாக இருப்பேன். ஒற்றைத் தலைமையாக ராமதாஸ் இருக்கும் வரை,
நமக்கு தோல்வி இல்லை’ என்று பேசியிருக்கிறார்.
1989ம் ஆண்டு பாட்டாளி மக்கள் கட்சியை ராமதாஸ் தொடங்கிய போது,
எனக்கு பதவி ஆசை கிடையாது. நானோ, என்னுடைய குடும்பத்தைச் சேர்ந்தவர்களோ தேர்தலில்
போட்டியிட மாட்டோம். எந்த பதவிக்கும் வரமாட்டோம் என்று உறுதியளித்தார். ஆனால், மகன்
அன்புமணியை மத்திய அமைச்சராக்கி அழகு பார்த்தார். இப்போது அன்புமணிக்கு பதிலாக மூத்த
மகள் காந்திமதியை அறிவித்துள்ளார்.
இதெல்லாம் எங்கே போய் முடியப்போகுதோ..?
