கோவைக்கு வந்திருக்கும் பிரதமர் மோடிக்கு சிக்கல் உருவாக்கும்
வகையில் மெட்ரோ திட்டத்தைக் கையில் எடுத்திருக்கிறார் முதல்வர் ஸ்டாலின். அதாவது மதுரை,
கோவை மெட்ரோ திட்டத்தை பாஜக திட்டமிட்டு தடுத்து நிறுத்தியதாக அறிக்கை விட்டு அதிரடி கிளப்பியிருக்கிறார்.
இதுகுறித்து ஸ்டாலின், ‘’அனைவருக்கும் பொதுவானதாகச் செயல்படுவதுதான்
அரசுக்கான இலக்கணம். அதற்கு மாறாக, பா.ஜ.க-வைத் தமிழ்நாட்டு மக்கள் நிராகரிப்பதற்காக
இப்படி பழிவாங்குவது கீழ்மையான போக்கு. பா.ஜ.க. ஆளும் மாநிலங்களில் உள்ள சிறிய இரண்டாம்
நிலை மாநகரங்களுக்குக் கூட மெட்ரோ ரயிலுக்கான ஒப்புதல் வழங்கிவிட்டு, எதிர்க்கட்சிகள்
ஆளும் மாநிலங்களைப் புறக்கணிப்பது அழகல்ல.
கூட்டாட்சிக் கருத்தியலை இப்படி சிதைப்பதைச் சுயமரியாதைமிக்க மண்ணான
தமிழ்நாடு ஒருபோதும் ஏற்றுக்கொள்ளாது. சென்னை மெட்ரோ பணிகளைத் தாமதப்படுத்தி முடக்க
நடந்த முயற்சிகளை முறியடித்து முன்னேறினோம்! அதேபோல மதுரை & கோவையிலும் வருங்கால
வளர்ச்சிக்கு இன்றியமையாத தேவையான மெட்ரோ இரயிலைக் கொண்டு வருவோம்!” என்று பதிவிட்டிருக்கிறார்.
இதற்கு பதிலளித்திருக்கும் பாஜகவினர், ’’மதுரை மற்றும் கோயம்புத்தூரில்
மெட்ரோ ரயில் திட்டத்தை செயல்படுத்துவதற்கு விரிவான திட்ட அறிக்கையைக் கேட்டு அதனைத்
திருப்பியனுப்பியிருக்கிறது. தேவையில்லாமல் விளையாட வேண்டாம்’’ என்று டென்ஷன் ஆகிவருகிறார்கள்.
அதேநேரம் திமுகவை மிரட்டுவது போன்று சென்னையில் 10-க்கும் மேற்பட்ட
இடங்களில் அமலாக்கத்துறை அதிகாரிகள் சோதனை நடத்தி வருகிறார்கள். குறிப்பாக சென்னை
கோடம்பாக்கம், கீழ்ப்பாக்கம் உள்ளிட்ட இடங்களில் அமலாக்கத்துறை அதிகாரிகள் சோதனை
நடத்தி வருவதாக தகவல் வெளியாகி உள்ளது.
அம்பத்தூர் திருவேங்கட நகரில் உள்ள அடுக்குமாடி குடியிருப்பில்
வசித்து வரும் பிரகாஷ், சைதாப்பேட்டை தெற்குமாட வீதியில் உள்ள கலைச்செல்வன், கேகே நகர்
லட்சுமணசாமி சாலையில் உள்ள தங்க நகை வியாபாரி சேட் ஆகியோர் வீடுகளில் அமலாக்கத்துறை
அதிகாரிகள் சோதனை நடத்தி வருகிறார்கள்.
இந்த சோதனை அடுத்தகட்டமாக திமுகவை நோக்கி பாயலாம் என்பதால் அதிர்ந்து
நிற்கிறார்கள்.
