டாக்டர் ராமதாஸுடன் அன்புமணி இணைந்துவிடுவார் என்று எதிர்பார்த்த
நிலை முழுமையாக மாறிவிட்டது. இரண்டு பேரும் தனித்தனி டிராக்கில் செல்வது உறுதியாகிவிட்டது.
இந்நிலையில் ராமதாஸ் பேச்சுவார்த்தையைத் தொடங்கியிருப்பதாக அறிவித்திருப்பது அன்புமணி
தரப்பினரை அதிர வைத்துள்ளது.
ராணிப்பேட்டையில் நேற்று பேசிய டாக்டர் ராமதாஸ், ’’இன்றைய கல்வி
அமைப்பு மூன்று நிலைகளாகப் பிரிந்து செயல்படுகிறது. வறுமைக் குடும்பத்திற்கொரு தரம்,
நடுத்தர வர்க்கத்திற்கொரு தரம், வளமுள்ளவர்களுக்கு மேலும் உயர்ந்த தரம் என ஒற்றுமையற்ற
நிலை உருவாகி வருகிறது.
பாமக கட்சி ஒரே சமூகத்திற்காக மட்டுமல்ல; தமிழகத்தில் உள்ள அனைத்து
சாதிகளின் உரிமைகளும் பாதுகாக்கப்பட வேண்டும். வன்னியர் சமூகத்திற்கான 10.5% இடஒதுக்கீடு
வழங்கப்பட வேண்டும் என்பதையும், அதன் அடிப்படையாக சாதிவாரி கணக்கெடுப்பு அவசியமெனும்
இரண்டு முக்கிய கோரிக்கைகளை முன்வைத்து, டிசம்பர் 12ஆம் தேதி மிகப்பெரிய போராட்டம்
நடத்தப்படும்.
தேர்தல் நேரத்தில் பெண்கள் 500 ரூபாய், 1000 ரூபாய் போன்ற பணம்
பெற்றுக்கொள்வதைத் தவிர்க்க வேண்டும்; வாக்குரிமை என்பது பணத்தால் வாங்கப்படக்கூடியதல்ல,
அது எதிர்காலத்தை தீர்மானிக்கும் பொறுப்பு என்பதை மனதில் கொள்ள வேண்டும் என அவர் உறுதியுடன்
பேசினார். பெண்கள் பணத்திற்கு வாக்கு விற்பதை மறுத்தால் நல்லாட்சி தானாக உருவாகும்.
பல அரசியல் கட்சிகளுடன் நடைபெற்று வரும் ஆலோசனைகள் இறுதி கட்டத்தை எட்டியுள்ளது.’’
என்று அறிவித்தார்.
இதையடுத்து வரவிருக்கும் சட்டப்பேரவைத் தேர்தலில் ராமதாஸ் பாமக
எந்த அணியுடன் இணைகிறது என்பது பெரும் கேள்விக்குறியாகியுள்ளது. அன்புமணியை பாஜக இயக்கும்
நிலையில், அதே அணியில் ராமதாஸ் சேர்வதற்கு வாய்ப்பு இல்லை. எனவே, திமுகவுடன் பேச்சுவார்த்தை
நடப்பதாக உறுதியுடன் சொல்லப்படுகிறது.
அதேநேரம், திமுகவில் ஏற்கெனவே நிறைய கட்சிகள் ஹவுஸ்ஃபுல்லாக இருப்பதால்
தனித்து நின்று தன்னுடைய பலத்தை ராம்தாஸ் காட்டவும் வாய்ப்பு உள்ளதாக கூறப்படுகிறது.
