அண்ணாமலையின் முக்கிய ஆதரவாளரான ஜானிராஜாவை பாஜகவில் இருந்து நயினார்
நாகேந்திரன் கட்டம் கட்டியிருக்கும் விவகாரம் கடும் சர்ச்சையாக மாறிவருகிறது. இதனாலே
கும்பகோணம் மீட்டிங்கில் அண்ணாமலை கலந்துகொள்ளவில்லை என்று சொல்லப்படுகிறது.
கும்பகோணத்தில் பாஜ கட்சியின் முக்கிய நிர்வாகிகள் கலந்துகொண்ட
பிரம்மாண்டமான மாநாட்டில் அண்ணாமலை கலந்துகொள்ளவில்லை. புயல் பாதிப்பு காரணமாக விமானம்
கிடைக்கவில்லை என்று காரணம் சொல்லப்பட்டாலும், உண்மையில் அவரது ஆதரவாளரை நீக்கிய நயினாருக்கு
எதிர்ப்பு தெரிவிக்கும் வகையிலே கலந்துகொள்ளவில்லை என்று தெரிகிறது.
நேற்றைய தினம் திருவள்ளூர் மேற்கு மாவட்ட பாஜ நிர்வாகியான ஜானிராஜா
பாஜகவில் இருந்து நீக்கப்பட்டார். இவர் அண்ணாமலைக்கு ஆதரவாக செயல்பட்டுவந்தவர் என்பது
குறிப்பிடத்தக்கது. கட்சிக்கு களங்கம் விளைவிக்கும் செயலில் ஈடுபட்டதாகக் கூறி இவரை
கட்சியின் அடிப்படை உறுப்பினர் பொறுப்பிலிருந்து நீக்கியிருக்கிறார் தமிழக பாஜ தலைவர்
நயினார் நாகேந்திரன்.
இதற்கு கொதிக்கும் அண்ணாமலை ஆதரவாளர்கள், ‘’கட்சியின் தீவிர உறுப்பினர்கள்
மற்றும் நிர்வாகிகள் யாராவது அண்ணாமலையாரை புகழ்ந்து ஒரு பதிவு போட்டால் போதும் உடனே
அவர்கள் சார்ந்த மாவட்ட தலைவர்களை தொடர்பு கொண்டு அந்த நிர்வாகியை தூக்கச் சொல்வது,
தீவிர உறுப்பினராக இருந்தால் அவர்களுக்கு பொறுப்பு வழங்காமல் புறக்கணிப்பது போன்ற மிகக்
கேவலமான அரசியலை செய்து கொண்டிருக்கிறார்கள் நைனார் தலைமையிலான இந்த திராவிட பாஜக.
தற்போது கட்சியின் அனைத்து பிரிவுகளிலும் உள்ள நிர்வாகிகளுக்கு
கேடி ராகவன் தான் பொறுப்பாளர் என்பதால் அவர்களும் அண்ணாமலையாருக்கு ஆதரவாக எந்த பதிவும்
போட முடியாத நிலைமையில் உள்ளனர். ஆனால் இவர்களால்
கட்டுப்படுத்த முடியாத ஒரே விஷயம், சமூக வலைத்தளத்தில் war room என சொல்லப்படும் ஆயிரக்கணக்கான
அண்ணாமலையாரின் தீவிர ஆதரவாளர்கள். இனியும் அண்ணாமலைக்கு ஆதரவாக இருப்போம்’’ என்று
கொதிக்கிறார்கள்.
இந்நிலையில் அண்ணாமலை ஆதரவாளர்களுடன் ரகசிய மீட்டிங் போட்டிருக்கிறார்.
தனிக்கட்சி ஆரம்பிக்கவேண்டும் என்று நெருக்கடி கொடுக்கப்பட்டது மட்டுமின்றி தேசிய தமிழர்
முன்னேற்றக் கழகம் என்று பெயரும் தேர்வு செய்யப்பட்டதாம். அண்ணாமலை கட்சி ஆரம்பித்தால்
விஜய் செல்வாக்கு குறைந்துபோகும் என்று குரல் கொடுக்கிறார்கள்.
அண்ணாமலை யோசிக்கிறார். என்ன நடக்கும் என்று பார்க்கலாம்.
