சென்னை, திருமண விழாவில் பேசிய ஸ்டாலின், ‘’திமுகவை அழித்து விடலாம்
என்று நிறைய பேர் கனவு கண்டு கொண்டிருக்கிறார்கள். எந்தக் கொம்பனாலும் இந்த இயக்கத்தை
தொட்டுக்கூட பார்க்க முடியாது…’ என்று வீரவசனம் பேசி வருகிறார். ஆனால், அவரது கூட்டணிக்குள்
எக்கச்சக்க குடைச்சல் ஆரம்பமாகியுள்ளது.
முதல் பஞ்சாயத்து திருமாவளவன். இந்த தேர்தலில் எப்படியும் இரட்டை
இலக்கத்தில் இடம் வாங்கிவிட வேண்டும் என்று துடிக்கிறார்.
இதுவரை வாயில்லாத பூச்சி போல் கப்சிப் என்று இருந்த காங்கிரஸ்
கட்சியும் தொடர்ந்து அதிக சீட் கேட்டு அடம் பிடிக்கிறது. உறுதியாக 60 சீட்டு வேண்டும்
இல்லையென்றால் விஜய் கட்சியுடன் கூட்டணிக்குப் போவோம் என்று மிரட்டத் தொடங்கியிருக்கிறார்கள்.
ராகுல் கூட்டணியில் உறுதியாக இருந்தாலும், கூடுதல் சீட் வாங்குவதற்கும் ஆர்வம் காட்டுகிறார்.
கிட்டத்தட்ட அடிமைக்கட்சி போன்று கிடந்த மதிமுகவுக்கும் இப்போது
உயிர் வந்துவிட்டது. வைகோவும், துரைவைகோவும் சுற்றுப்பயணம், மீட்டிங் என்று தீவிரமாக
செயல்படுகிறார்கள். 10 சீட்டுடன் ஒரு ராஜ்யசபா சீட் என்பது அவர்களின் கோரிக்கை. அப்படி
இல்லை என்றால் அதிமுகவுடன் சேரத் தயாராக இருக்கிறது.
கம்யூனிஸ்ட் கட்சிகளும் இரட்டை இலக்கம் வேண்டும் என்று செங்கொடி
தூக்கியிருக்கிறார்கள். எனவே, எப்படியும் 20 சீட் போய்விடும்.
இவர்கள் எல்லாம் பரவாயில்லை, குட்டியூண்டு கட்சிகளின் ராஜ்ஜியமும்
அதிகரித்துவிட்டது. திமுக தங்களை கழட்டிவிடக் கூடாது என்பதற்காக வேல்முருகன் புது வகையிலான
மிரட்டலில் இறங்கியிருக்கிறார்.
தனியாக சீட்டு கேட்டால் சிக்கலாகிவிடும் என்பதால் மனிதநேய ஜனநாயக
கட்சியின் தலைவர் தமிமுன் அன்சாரி, தமிழக கொங்கு இளைஞர் பேரவை தலைவர் தனியரசு, கருணாஸ்
ஆகியோர்களுடன் இணைந்து ஒரு தனிக்கூட்டணி போட்டிருக்கிறார். இவர்கள் எல்லோருக்கும் சீட்
இல்லை என்றால் ஒட்டுமொத்தமாக கூட்டணி மாறிவிடுவார்கள்.
ஆக, திமுகவுக்கு கடுமையான சிக்கல் காத்திருக்கிறது.
