தமிழகத்தில் இடைத் தேர்தலை எப்படி எதிர்கொள்ள வேண்டும் என்பதை மாற்றிக் காட்டியதே மு.க.அழகிரியின் திருமங்கலம் ஃபார்முலா தான். அதற்கு முன்னதாகவும் ஓட்டுக்குப் பணம் கொடுக்கப்பட்ட வரலாறு இருந்தது என்றாலும், அவையெல்லாம் அரசல் புரசலாக நடந்த சமாசாரம். ஆனால், வீட்டுக்கு வீடு, ஒவ்வொரு ஓட்டுக்கும் பணம் பிரித்துக்கொடுத்து கருணாநிதிக்கு மாபெரும் வெற்றியை பெற்றுக்கொடுத்தார் அழகிரி.
அன்று முதல் இடைத் தேர்தல் என்றாலே அங்கு ஜனநாயகத்துக்கு இடமில்லை என்று மாறிப்போனது. இதில் ஆர்.கே.நகர் இடைத் தேர்தலில் டிடிவி தினகரன் டோக்கன் என்று புதிய சிஸ்டத்தைக் கொண்டுவந்து தி.மு.க. உள்ளிட்ட அத்தனை கட்சிகளின் டெபாசிட்டையும் பறிக்கும் சாதனையையும் செய்து காட்டினார்.
இந்த விக்கிரவாண்டி தேர்தலில் ஓட்டுக்கு 2,000 ரூபாய், புடவை, லட்டுக்குள் மூக்குத்தி என்று பல்வேறு வகையில் பணவிநியோகம் நடைபெற்றுள்ளது. தி.மு.க.வுடன் போட்டி போட முடியாது என்றாலும் பா.ம.க.வினரும் வாக்குக்கு 500 ரூபாய் கொடுத்திருக்கிறார்கள். ஆகவே, தி.மு.க. அமோக வெற்றி பெற்றுள்ளது.
இந்த வெற்றியை தி.மு.க. அரசின் சாதனைக்கு மக்கள் கொடுத்திருக்கும் அங்கீகாரம், ஜனநாயகத்துக்குக் கிடைத்த வெற்றி என்றெல்லாம் சொல்வது ஓவர் காமெடி. உண்மையில் இது, கொள்ளை அடிக்கப்பட்ட வெற்றி. பணம் கொடுத்து விக்கிரவாண்டி வாங்கப்பட்டுள்ளது என்பதே உண்மை.
