பாமக எந்த கட்சியுடன் கூட்டணி சேர்கிறதோ, அந்த கட்சியே வெற்றி பெறும் என்பது ஒரு காலத்தில் தேர்தல் கணக்காக இருந்தது. இப்போது, மாம்பழம் சின்னத்துக்கு அடிதடி, வெட்டுக்குத்து நடப்பதைப் பார்க்கும்போது, வரும் 2026 தேர்தலில் பாமகவுக்கு முடிவுரை எழுதப்படும் வாய்ப்பே அதிகம் என்று தெரியவருகிறது.
டாக்டர் ராமதாஸ்க்கும் அன்புமணிக்கும் இடையில் மத்தியஸ்தம் செய்துவைக்க பலரும் மேற்கொண்ட முயற்சிகள் தோல்வி அடைந்துவிட்டன. கடந்த தேர்தலில் ராமதாஸ் அதிமுகவுடன் கூட்டணி சேர்வதற்கு முயற்சி செய்தார். அதற்குள் அண்ணாமலை குறுக்கே விழுந்து அன்புமணியை அவரது கூட்டணிக்கு அள்ளிப் போய்விட்டார். இதையடுத்தே பிரிவு தவிர்க்க முடியாததாக மாறிவிட்டது. எல்லாம் அண்ணாமலை லீலை என்கிறார்கள்.
ராமதாஸ் தனது மருமகனான முகுந்தனை இளைஞரணித் தலைவராக அறிவித்ததை அடுத்தே அன்புமணி மோதல் நடந்ததாக சொல்லப்படுவது எந்த உண்மையும் இல்லை. ஏனென்றால் அதற்கு முன்னதாகவே மோதல் ஆரம்பித்துவிட்டது.
அன்புமணி கட்சித் தலைவராக இருந்தாலும், கட்சி முக்கிய பதவிகளில் நியமனங்கள் தொடர்பான கருத்து வேறுபாடுகள் இருந்துவந்தன. கட்சியின் செயல்பாடுகள் மற்றும் முடிவுகளில் ராமதாஸ் சர்வாதிகாரப் போக்குடன் இருப்பதாகக் கூறி பனையூரில் கட்சி அலுவலகத்தைத் தொடங்கி நடத்திவருகிறார்.
பாஜக ஆதரவுடன் கட்சியும் சின்னமும் இப்போது அன்புமணிக்கு சொந்தமாகிவிட்டது. ஆனாலும் டாக்டர் ராமதாஸ் விட்டுக்கொடுக்காமல் போராடி வருகிறார். சமீபத்தில், பாமகவையும் என்னையும் கவனிக்க மிகவும் பொருத்தமானவர் ஸ்ரீ காந்தி தான் என்று அவரது மகளை முன்னிலைப் படுத்தியதை அடுத்து இந்த மோதல் இப்போதைக்குள் முடிவுக்கு வரப்போவதில்லை என்பது உறுதியாகியுள்ளது.
இந்த மோதல், 2026 சட்டமன்ற தேர்தலை நெருங்கும் வேளையில் பாமகவுக்கு சவாலாக மாறிவிட்டது. ஏற்கெனவே பாமக தொடர் தோல்வி அடைந்துவரும் நிலையில், அந்த ஓட்டுகள் இரண்டு பக்கம் விழுந்தால் ஒரேயடியாக கட்சிக்கு சங்குதான்.
