பிரதமர் நரேந்திர மோடி ஆட்சிக்கு வந்து 10 வருடங்கள் நிறைவடையப் போகிறது. இந்த காலகட்டத்தில் சீனப் படைகள் பல முறை நமது எல்லைக்குள் வந்து ஆக்கிரமிப்பு செய்தது மட்டுமின்றி, நமது நிலங்களையும் பறித்துக்கொண்டது. இதுவரை சீனாவின் ஆக்கிரமிப்பு குறித்து ஒரே ஒரு முறை கூட பிரதமர் பேசியதே இல்லை. அதேநேரம், விவசாயிகள் டெல்லியை நோக்கி வருகிறார்கள் என்று செய்தி கேட்டதுமே, தன்னுடைய ஆட்சியின் வீரியத்தைக் காட்டத் தொடங்கியிருக்கிறார்.
விவசாயிகள் வரும் பாதைகளை அடைத்து வைப்பது, ரோடுகளில் ஆணிகளை நட்டுவைப்பது, கண்ணீர்ப் புகைக் குண்டுகளை வீசி விரட்டுவது, துப்பாக்கி ஏந்திய காவலர்களைக் காட்டி மிரட்டுவது என்று வீரத்தனத்தை விவசாயிகளிடம் காட்டுவது கடும் விமர்சனத்தை உருவாக்கியுள்ளது. விவசாயிகளின் டிராக்டர் சத்தம் மோடிக்கு பீரங்கி சத்தமாகக் கேட்கிறது என்பது தான் உண்மை.
இவர்கள் சாதாரண விவசாயிகள். இந்தியக் குடிமக்கள். தங்களுடைய விளை பொருட்களுக்கு ஆதார விலை கேட்பதை போர்க்குற்றமாகக் கருதுவதைக் கண்டு விவசாயிகள் மட்டுமல்ல, பொதுமக்களும் அதிர்ந்துபோய் நிற்கிறார்கள்.
மோடியின் வீராப்புக்கு விடை சொல்லும் நாள் நெருங்கிவருகிறது.
