கரூர் கூட்ட நெரிசலில் உயிரிழந்தவர்களின் குடும்பத்தினரை விஜய்
திங்கட்கிழமை மகாபலிபுரத்தில் சந்திக்க இருக்கும்
நிலையில், உட்கட்சியில் மோதல் அதிகரித்திருப்பதாக சொல்லப்படுகிறது.
கரூரில் பாதிக்கப்பட்ட மக்கள் ஒவ்வொருவரின் வீட்டிற்கும் நேரில்
சென்று சந்திக்க விஜய் திட்டமிட்டார். ஆனால் சாலை மார்க்கமாகச் செல்லும்போது அது சாத்தியம்
இல்லை. கூட்டம் கூட வாய்ப்பு உள்ளது என்று பலரும் கூறியதால், அனைத்து குடும்பத்தினரையும்
கரூரில் உள்ள ஏதேனும் ஒரு மண்டபத்தில் சந்திக்க திட்டமிட்டனர்.
ஆனால் கரூரில் மண்டபம் கிடைப்பதில் சிக்கல் ஏற்பட்டது எனக் கட்சியின்
தரப்பில் கூறுகின்றனர். எனவே, நாமக்கல்லில் தமிழக வெற்றிக் கழகத்தின் அடுத்த கட்ட தலைவர்கள்
ஒரு மண்டபத்தைத் தேர்வு செய்தனர். ஆனால் விஜய் நாமக்கல்லில் வேண்டாம் கரூரில்தான் சந்திக்க
வேண்டும் என்று உறுதியாக இருந்தார் இதனால் மண்டபத்தை ஒப்பந்தம் செய்யும் பணிகள் அவர்கள்
தொடர்ந்து முயற்சித்துள்ளனர். இறுதிவரை அது சாத்தியமாகவில்லை.
மேலும் நாட்கள் கடந்துகொண்டே செல்வதால் சென்னையில் சந்தித்துவிடலாம்
என்று ஆலோசிக்கப்பட்டுள்ளது. அதேசமயம் பாதிக்கப்பட்ட குடும்பத்தினரின் கருத்தைக் கேட்டபின்
முடிவெடுக்கலாம் என கூறியுள்ளார் விஜய். அதன் அடிப்படையில் தற்போது மகாபலிபுரத்தில்
சந்திப்பது என முடிவெடுத்துள்ளனர்.
இந்த விவகாரத்தில் முழுக்க முழுக்க ஆதவ் அர்ஜூனா பேச்சைக் கேட்டு
மட்டுமே விஜய் நடப்பதாக கூறப்படுகிறது. மேலும் புஸ்ஸி ஆனந்த் மற்றும் ஜான் ஆரோக்கியசாமியின்
ஆலோசனைகளை விஜய் ஏற்கவில்லை. எனவே, மூன்று பேருக்கும் இடையில் மல்லுக்கட்டு அதிகரித்துள்ளது.
இதன் அடிப்படையில் மூன்று பேரின் ஆதரவாளர்களும் ஒருவரையொருவர் குற்றம் சாட்டிவருகிறார்கள்.
கட்சி ஒரு தேர்தலை சந்திக்கு முன்பாகவே இப்படியொரு இடியாப்பச்
சிக்கலை சந்தித்திருப்பது விஜய் நிர்வாகிகளை அதிர வைத்துள்ளது.
