சனிக்கிழமை என்றாலே விஜய் வெளியேவரும் தினமாக இருந்துவந்தது. விஜய்
வெளியே வரும் சனிக்கிழமை தோறும் தன்னுடைய ரவுடி என்று பெயர் சூட்டப்பட்ட நாயுடன் ஒரு
போட்டோ போட்டு விஜய் ரசிகர்களுடன் வம்பிழுத்து வந்தார் துணை முதல்வர் உதயநிதி ஸ்டாலின்.
கரூர் சம்பவத்திற்குப் பிறகு விஜய் வெளியே வருவதில்லை. ஆனாலும்,
நாய் போட்டோ போடுவதை உதயநிதி நிறுத்தவே இல்லை. அதுவும் இன்றைய போட்டோ விஜய் ரசிகர்களை
ரொம்பவே டென்ஷன் ஆக்கியுள்ளது. அதாவது நாயின் தலைக்குப் பின்னே தன்னுடைய தலையை மறைத்து
போஸ் கொடுத்திருக்கிறார்.
அதாவது, விஜய் சம்பவம் நடந்து இத்தனை நாட்களாகியும் தலைமறைவாக
இருக்கிறார் என்பதை கிண்டல் செய்திருக்கிறார். இந்த விவகாரத்திற்கு விஜய் ரசிகர்கள்
கடும் கோபத்துடன் ரியாக்ட் செய்கிறார்கள்.
உதயநிதியை எதிர்த்து விஜய் பேசுகிறாரோ இல்லையோ, நேற்று எடப்பாடி
பழனிசாமி கடுமையாக விமர்சனம் வைத்திருக்கிறார். ஈரோடு எழுச்சியுரையில் எடப்பாடி பழனிசாமி
பாலிடாயில் என்று கூறியிருக்கிறார். மேலும் அவர், ‘’ உதயநிதி
எப்படி பதவிக்கு வந்தார்? கருணநிதி பேரன், ஸ்டாலின் மகன் என்பது தவிர என்ன உழைப்பு
இருக்கிறது? இவர் பேசுகிறார். பால்டாயில் எல்லாம் பேசுகிறது. கரூரில் 41 உயிர்களை இழந்துவிட்டோம்.
முதல்வர் இரவே வந்து பார்த்தார், சரி. உதயநிதி சுற்றுலாவில் இருந்து கரூர் வந்து அஞ்சலி
செலுத்திவிட்டு மீண்டும் சுற்றுலா சென்றவர் இதுகுறித்து பேசலாமா? நாட்டை ஆளும் முதல்வர்,
துணை முதல்வர்கள் பொறுப்புடன் செயல்பட வேண்டாமா? இதை விட்டுவிட்டு உல்லாசப் பயணம் போகும்
உங்களுக்கு எங்களைப் பற்றி பேச அருகதை, யோக்கியதை இல்லை..
அதிமுக கட்சி அலுவலகம் அமித் ஷா வீட்டில் இயங்குகிறது என்று துணை
முதல்வர் உதயநிதி துறையூரில் பேசியிருக்கிறார். உதயநிதி அவர்களே, உங்களுக்குக் கண்
தெரியவில்லை என்றால் கண்ணாடி வாங்கித்தருகிறேன். ராயப்பேட்டையில் தான் அதிமுக அலுவலகம்
இருக்கிறது. நீங்களும் உங்க அப்பாவும் திட்டம் போட்டீர்கள். அதிமுக அலுவலகத்தை அடித்து
நொறுக்குவதற்குத் திட்டம் போட்டீர்கள். சில பேர் தூண்டுதலின்பேரில் அடித்து நொறுக்கினார்கள்.
அதை சாக்காக வைத்து அலுவலகத்துக்கு சீல் வைத்தீர்கள். ஆனால், அந்த சீலை அதிமுக உடைத்தெறிந்தது.
அம்மா முதல்வராக இருந்தபோது, கருணாநிதி காலத்தில் திமுக இரண்டாக
உடைந்தது, கருணாநிதி ஒருபக்கம், வைகோ ஒருபக்கம். அப்போது அந்த கட்சியை கைப்பற்ற முயற்சித்தனர்,
அறிவாலயத்தை காப்பாற்றிக் கொடுத்த கட்சி அதிமுக கட்சி, மறந்துவிடாதீர்கள், உங்களைப்போல
எதிர்க்கட்சிகளை பழிவாங்கும் எண்ணம் இல்லை, சக்கரம் சுழல்கிறது, கீழே உள்ள சக்கரம்
மேலே வரும். அதிமுக ஆட்சி வந்ததும் பதிலடி கொடுப்போம்..’’ என்று பேசியிருக்கிறார்.
