கரூர் துயர சம்பவத்துக்கு விஜய் நேரில் சென்று ஆறுதல் அளிப்பார்
என்று சொல்லப்பட்டுவந்தது. அக்டோபர் 13ம் தேதி என்று முதலில் நாள் குறிக்கப்பட்டது.
அதன்பிறகு அக்டோபர் 17 என்று சொல்லப்பட்டது. ஆனால், இப்போது அந்த தேதியிலும் குழப்பம்
இருப்பதாக கூறப்படுவதால் தள்ளிப்போவது உறுதியாகிறது.
கரூருக்கு நேரில் செல்லும் விஜய்க்கு பலத்த பாதுகாப்பு ஏற்பாடுகளைச்
செய்யக் கோரி, தமிழக வெற்றிக் கழகத்தின் சார்பில், சென்னை டிஜிபி அலுவலகத்தில் மனு
அளிக்கப்பட்டது. பாதிக்கப்பட்ட நபர்களின் வீட்டுக்குச் செல்வது நெரிசலை உருவாக்கிவிடும்
என்பதால் ஒரு மண்டபத்தில் வைப்பதற்கு முடிவு செய்யப்பட்டது.
விஜய்யின் வாகனத்தை பின்தொடர்ந்து வேறு எந்த வாகனமும் வரக்கூடாது
எனவும் கட்டுப்பாடு விதிக்கப்பட்டுள்ளது. இது தொடர்பாக கரூர் மாவட்டக் காவல் கண்காணிப்பாளருடன்,
விஜய் தரப்பில் ஆலோசனை நடத்தப்பட்டது. இந்தத் தனிப்பட்ட சந்திப்பின் போது, ஏற்கெனவே
அறிவிக்கப்பட்டிருந்த நிவாரணத் தொகையை விஜய் நேரில் வழங்குவார் என்றும் எதிர்பார்க்கப்படுகிறது.
மண்டபம் தேர்வு செய்வது தாமதமானதால் 17ம் தேதி என்று தள்ளிவைக்கப்பட்டது.
இப்போதும் இந்த சந்திப்பிற்குப் பல கடுமையான நிபந்தனைகள் விதிக்கப்பட்டுள்ளன. பாதிக்கப்பட்ட
குடும்பத்தினர், பொதுமக்கள், கட்சித் தொண்டர்கள் மற்றும் ஊடகவியலாளர்கள் என யாருக்கும்
இந்த நிகழ்வில் அனுமதி இல்லை என்று திட்டவட்டமாகத் தெரிவிக்கப்பட்டுள்ளது. பாதிக்கப்பட்ட
ஒவ்வொரு குடும்பத்திலிருந்தும் ஐந்து நபர்கள் மட்டுமே கலந்துகொள்ள வேண்டும் என அறிவுறுத்தப்பட்டுள்ளது.
இந்த நிலையில் திருமண மண்டபத்தைக் கொடுக்க அத்தனை பேரும் தயக்கம்
காட்டுகிறார்கள். எனவே, பட்டா இடத்தில் விழா நடத்துவது குறித்து ஆலோசனை செய்யப்பட்டு
வருகிறது. பாதிக்கப்பட்டவர்களை விஜய் சந்திக்கவில்லை என்று ஏற்கெனவே கடும் அதிருப்தி
நிலவும் நிலையில், இந்த தாமதம் மேலும் சிக்கலை உருவாக்கும் என்றே தெரிகிறது.
