2024 நாடாளுமன்றத் தேர்தலில் சீமானின் நாம் தமிழர் கட்சி 40 தொகுதிகளிலும் சேர்த்து 35,35,467 வாக்குகள் பெற்று 8.21% விழுக்காடு வாக்குகள் பெற்றுள்ளது ஒரு சாதனை என்றே கூற வேண்டும். ஏனென்றால் அவர்கள் வழக்கமாக வைத்திருந்த கரும்பு விவசாயி சின்னம் மறுக்கப்பட்டு ஒலிவாங்கி சின்னம் புதிதாக கொடுக்கப்பட்டது. அதுவும் அதுவும் தேர்தலுக்கு சில தினங்களுக்கு முன்பே கொடுக்கப்பட்டது.
அதோடு தேர்தலுக்கு பணம் கொடுக்கும் கலாச்சாரம் நாம் தமிழரிடம் இல்லை. வேட்பாளர்கள் யார் என்ற அறிமுகம் கிடையாது. சீமான் யாரை நிறுத்துகிறாரோ அவரே வேட்பாளர். எனவே, ஒவ்வொரு வேட்பாளரையும் சீமானாகவே பார்த்து ஓட்டு போட்டிருக்கிறார்கள்.
இந்த தேர்தலில் எந்தக் கட்சியுடன் கூட்டணி என்று மற்ற கட்சியினரையும் தொண்டர்களையும் அல்லாட விடுவது கிடையாது. யாருடனும் கூட்டணி கிடையாது என்று தெளிவான கொள்கையில் வெற்றி, தோல்வி பற்றி கவலைப்படாமல் பயணம் செய்துகொண்டிருக்கிறார்.
போட்டியிட்ட 40 தொகுதிகளிலும் நாம் தமிழர் கட்சி டெபாசிட் பறி கொடுத்துள்ளது என்றாலும் 6 நாடாளுமன்றத் தொகுதிகளில் மூன்றாவது இடம் பிடித்திருக்கிறது. திருச்சி, ஈரோடு, கள்ளக்குறிச்சி, கன்னியாகுமரி, நாகை, புதுச்சேரி போன்ற தொகுதிகளில் நாம் தமிழரே மூன்றாவது கட்சி.
12 நாடாளுமன்றத் தொகுதிகளில் ஒரு லட்சம் வாக்குகளுக்கு அதிகம் பெற்றுள்ளது என்பதுடன் சிவகங்கை தொகுதியில் மட்டும் 1.63 லட்சம் வாங்கியிருப்பது ஆச்சர்யமான திருப்பம். அங்கீகரிக்கப்பட்ட கட்சியாக மாறுகிறதோ இல்லையோ, தவிர்க்க முடியாத ஒரு கட்சியாக இருக்கிறது நாம் தமிழர். ஆனால், இது மட்டுமே போதுமா என்ற கேள்வியும் தவிர்க்க முடியாது.
இதேபோன்று தொடர்ந்து முயற்சி செய்துகொண்டே இருந்தாலும் ஆட்சியைப் பிடிப்பது 50 ஆண்டுகளானாலும் சாத்தியம் இல்லை. எனவே, சீமான் ஆட்சிக்கு வரும் வழியையும் யோசிக்க வேண்டியது முக்கியம்.
