அரசியல் சாசனத்தை மதித்து நடக்க வேண்டிய வழக்கறிஞர் ஒருவர் சனாதனத்தை
ஆதரித்து தலைமை நீதிபதி மீது செருப்பை வீசி இருப்பது அகில இந்திய அளவில் பெரும் சர்ச்சையை
உருவாக்கியுள்ளது.
நீதிபதியை பகிரங்கமாக அவமதித்த நீதித்துறையின் மீது மக்கள் வைத்துள்ள
நம்பிக்கையை சீர்குலைக்கும் வகையில் செயல்பட்ட வழக்கறிஞரின் உரிமத்தை இந்திய பார் கவுன்சில்
உடனடியாக ரத்து செய்ய வேண்டும் என்ற கோரிக்கை எழுந்துள்ளது.
கஜுராஹோ ஜாவரி கோவிலில் இஸ்லாமியர் படையெடுப்பின் போது சிதைந்தபோன
விஷ்ணு சிலையை மீட்டெடுக்க உச்சநீதிமன்றம் உத்தரவிட வேண்டும் என்று ஒரு இந்து பக்தர்
ஒருவர் அளித்த மனு நேற்று தலைமை நீதிபதி பி.ஆர்.கவாய் முன் வந்திருக்கிறது…
இப்போது ஏதாவது செய்யுமாறு தெய்வத்தையே கேளுங்களேன். நீங்கள் விஷ்ணுவின் அதீத பக்தர்
என்று கூறுகிறீர்கள். ஆகவே போய் பிரார்த்தனை செய்யுங்கள்.”..என்பதற்காகவே அவர்
மீது செருப்பு வீசப்பட்டது.
அதை கண்ட உச்சநீதிமன்ற தலைமை நீதிபதியை, “கவனத்தை சிதறவிடாதீர்கள்,
இது என்னை பாதிக்காது” என்று சனாதனத்தை தூக்கி எறிந்து இருக்கிறார்!
இதுகுறித்து ஆசிரியர் வீரமணி,
‘’சனாதன ஹிந்துத்துவக் கும்பலின் செயல்கள் எவ்வளவு கீழிறக்கத்துக்கும் செல்லும்
என்பது நமக்குப் புதிதல்ல. ஆனால், உச்சநீதிமன்றத்
தலைமை நீதிபதியாகப் பதவியேற்றது முதல் மாண்பமை பி.ஆர்.கவாய் மீது வன்மத்தைக்
கக்கியபடியே இருக்கின்றனர். ஒடுக்கப்பட்ட சமூகத்தவராகவும், முற்போக்குச் சிந்தனை படைத்தவராகவும் திகழும் மாண்பமை
நீதிபதி பி.ஆர்.கவாய் அவர்கள் பதவியேற்ற பின் முதல்முறையாக மகாராஷ்டிரத்துக்குப்
போயிருந்தபோதும், அரசு
முறைப்படி அவருக்குத் தரப்பட வேண்டிய மரியாதையைத் தராமல் அவமதித்தனர். அவர்
முறையாக அரசியலமைப்புச் சட்டப்படி நடக்கிறார் என்றதும் ஹிந்துத்துவ பாசிச
சக்திகளால் பொறுத்துக் கொள்ள முடியவில்லை. அந்தக் காலணி அவர் மீது மட்டும்
வீசப்பட்ட காலணி அல்ல; இந்திய
நீதித்துறையை அச்சுறுத்துவதற்காக வீசப்பட்ட காலணி ஆகும்.
தலைமை நீதிபதி பி.ஆர்.கவாய்
அவர்கள் அடுத்த மாதம் ஓய்வு பெறவிருக்கிறார். அவருக்குப் பின்னும் வருவோரை
அச்சுறுத்தவே இந்த முயற்சி! நீதிபதிகளே ஆயினும் தங்கள் ஆதிக்கத்துக்கு எதிராக
எதையும் நீதிமன்றங்கள் செய்தால், அவர்களை
அவமானப்படுத்துவோம் என்று அச்சுறுத்தும் இந்தச் செயல் தனிப்பட்டது அல்ல; இதன் பின்னணியில் இருக்கும் அமைப்புகள் யார் என்பதைக்
கண்டுபிடித்து உரிய நடவடிக்கை எடுக்க வேண்டும். ஆனால், மிகுந்த பெருந்தன்மையுடனும், பொறுமையுடனும் “கவனத்தைச் சிதறவிடாதீர்கள்; இது என்னைப் பாதிக்காது” எனக் கூறி எந்த பரபரப்பும் இன்றி
வழக்குரைஞர்களிடம் வாதங்களைத் தொடருமாறு கேட்டுக்கொண்ட பக்குவமும் பெருந்தன்மையும், எத்தனையோ அவமதிப்புகளைச் சந்தித்து, உயர்ந்த நிலைக்கு வந்திருப்பவர் அவர் என்பதற்குச் சான்று
ஆகும்.
’சனாதன அவமதிப்பு’ என்ற
கூக்குரல் மூலம் இதன் பின்னணியில் எந்தத் தத்துவம் இருக்கிறது என்பது மிக
வெளிப்படையாகத் தெரிந்துவிட்டது. உச்சநீதிமன்றத் தலைமை நீதிபதியின் மீதான இந்த
அவமதிப்பு முயற்சி கடும் கண்டனத்துக்கு உரியதாகும். நீதித் துறையை அச்சுறுத்தும்
போக்கு ஒரு போதும் பொறுத்துக் கொள்ள முடியாதது. இந்த அநாகரிக, ஜாதித் திமிர் பிடித்த சனாதனவாதிகளை மக்கள் அடையாளம் கண்டு
ஒதுக்கித் தள்ள வேண்டும்..’’
இந்த விஷயத்தில் பிரதமர் மோடி
கண்டனம் தெரிவித்திருந்தாலும் ஆளும் பாஜகவினர் அமைதி காத்து வருகின்றனர். நீதிமன்றத்தையும்
பாஜக கைப்பற்ற முயற்சி செய்வதையே இது காட்டுகிறது என்கிறார்கள்.
