மிக்ஜாம் புயல் பேரிடர் நிவாரணப் பணிகளுக்காக அசோக் லேலண்ட் நிறுவனத்தின் மேலாண்மை இயக்குனர் ரூ.3 கோடிக்கான காசோலையை முதலமைச்சர் மு.க.ஸ்டாலினை நேரில் சந்தித்து வழங்கினார்.
சென்னையை புரட்டிப்போட்ட மிக்ஜாம் புயல் காரணமாக பெரியளவில் சேதம் ஏற்பட்டுள்ளது. வரலாறு காணாத மழை காரணமாக சென்னையில் பல்வேறு பகுதிகளில் மழைநீர் வெள்ளம் போல் சூழ்ந்து பொதுமக்களை அவதிப்பட வைத்துள்ளது. இதனால் மக்கள் பாதுப்பாக மீட்கப்பட்டு முகாம்களில் தங்கவைக்கப்பட்டுள்ள நிலையில், அவர்களுக்கு தமிழக அரசின் சார்பில் நலத்திட்ட உதவிகள் வழங்கப்பட்டு வருகின்றன.
மிக்ஜாம் புயல் பேரிடர் மீட்புப்பணிக்காக பல்வேறு தரப்பினர் முதலமைச்சர் பொது நிவாரண நிதிக்கு உதவித்தொகை வழங்கி வருகின்றனர்.
அந்த வகையில் இன்று (டிச.9) சென்னை தலைமை செயலகத்திற்கு சென்ற அசோக் லேலண்ட் நிறுவனத்தின் மேலாண்மை இயக்குனர் மற்றும் முதன்மை செயல் அலுவலர் ஷேணு அகர்வால், முதலமைச்சர் மு.க.ஸ்டாலினை நேரில் சந்தித் ரூ.3 கோடிக்கான காசோலையை முதலமைச்சரின் பொது நிவாரண நிதிக்காக வழங்கினார். இந்த சந்திப்பின் போது அமைச்சர் டி.ஆர்.பி.ராஜா, அசோக் லேலண்ட் நிறுவனத்தின் பெருநிறுவன சமூக பொறுப்பு தலைவர் என்.வி.பாலச்சந்தர், துணைத் தலைவர் டி.சசிகுமார் உள்ளிட்டோர் உடன் இருந்தனர்.
அதேபோல் பி.எஸ்.ஜி. குழுமத்தின் லீப் கிரீன் எனர்ஜி பிரைவேட் லிமிடெட் நிறுவனத்தின் நிறுவனர் மற்றும் மேலாண்மை இயக்குனர் ராஜீவ் கார்த்திகேயன் மற்றும் நிறுவனர் மற்றும் முதன்மை செயல் அலுவலர் தேவ் ஆனந்த் ஆகியோர் சென்னை தலைமை செயலகத்திற்கு நேரில் வந்திருந்தனர். அதன் பின்னர் ரூ.1 கோடிக்கான காசோலையை முதலமைச்சர் மு.க.ஸ்டாலினிடம் வழங்கினார்கள். இந்த சந்திப்பின் போது அமைச்சர் டி.ஆர்.பி.ராஜா உடனிருந்தார்.
மேலும் விடுதலைசிறுத்தைகள் கட்சியின் தலைவரும், எம்.பி.யுமான தொல்.திருமாவளவன், முதலமைச்சர் மு.க.ஸ்டாலினை இன்று (டிச.9) தலைமை செயலகத்தில் சந்தித்தார். அப்போது விடுதலை சிறுத்தைகள் கட்சியின் நாடாளுமன்ற மற்றும் சட்டமன்ற உறுப்பினர்களின் ஒரு மாத சம்பளத் தொகையான ரூ.10 லட்சத்திற்கான காசோலையை, மிக்ஜாம் புயல் பேரிடர் நிவாரணப் பணிகளுக்காக முதலமைச்சரின் பொது நிவாரண நிதிக்கு வழங்கினார். இந்த சந்திப்பின் போது விடுதலை சிறுத்தைகள கட்சியின் சட்டமன்ற உறுப்பினர்கள் எஸ்.எஸ்.பாலாஜி, எம்.பாபு மற்றும் நிர்வாகிகள் உடன் இருந்தனர்.
