நயினார் நாகேந்திரன் தொடங்கியிருக்கும், தமிழகம் தலைநிமிர, தமிழனின்
பயணம்’ யாத்திரை நேற்று மதுரையில் தொடங்கியது. இந்த மேடையில் எம்.ஜி.ஆர்., ஜெயலலிதா
மற்றும் எடப்பாடி பழனிசாமி படங்கள் வைக்கப்பட்டிருப்பது இரண்டு கட்சிக்குள்ளும் கடும்
சலசலப்பை ஏற்படுத்தியிருக்கிறது.
இந்த யாத்திரை குறித்து நயினார் நாகேந்திரன், ‘’தமிழகத்தில் நடைபெறும்
கொடுங்கோல் ஆட்சிக்கு முற்றுப்புள்ளி வைக்க, நமது “தமிழகம் தலைநிமிர, தமிழனின் பயணம்”
துவங்கி விட்டது. ஆட்சியை காக்க கட்டுக்கதைகள் பல கட்டவிழ்த்து வரும் திராவிட முன்னேற்றக்
கழகத்தின் விடியாத ஆட்சியாளர்களின் பிடியிலிருந்து விடுவிக்கும் மக்கள் சந்திப்பு பயணம்
மதுரையில் துவங்கிவிட்டது’’ என்று தெரிவித்துள்ளார்.
இந்த கூட்டத்தில் மத்திய இணை அமைச்சர் எல்.முருகன், பாஜக மேலிட
பொறுப்பாளர் மேனன் அரவிந்த், தேசிய இணை பொறுப்பாளர் ரெட்டி சுதாகர், முன்னாள் தமிழ்நாடு
பாஜக தலைவர் அண்ணாமலை ஆகியோருடன் அதிமுகவைச் சேர்ந்த ஆர். பி. உதயகுமார், செல்லூர்
ராஜூ, ஜி.கே.வாசன், ஏ.சி.சண்முகம் உள்ளிட்ட பலரும் கலந்துகொண்டனர்.
இந்த தொடக்க விழா மேடையில் எம்.ஜி.ஆர்., ஜெயலலிதா படங்களும் பிரதானமாக
இடம் பெற்றுள்ளது. அதோடு பாஜக பிரச்சார பாடலில் ஜெயலலிதாவின் பேச்சும் இடம் பிடித்தது.
அதாவது, “எந்த நாட்டிலாவது தந்தை முதலமைச்சர், மகன் துணை முதலமைச்சர், மற்றொரு மகன்
மத்திய அமைச்சர், பேரன் மத்திய அமைச்சர், மகள் நாடாளுமன்ற உறுப்பினர் என இத்தனை பதவிகளை
ஆக்கிரமித்துக்கொண்டு, அழுக்கை தின்னும் மீனை போல் அதிகாரத்தை கொத்திக் கொதறி தின்னும்
இது போன்ற குடும்பம் ஒன்று உலகத்தின் எந்த மூலையிலாவது இருக்கிறதா” என்று ஜெயலலிதா
பேசியதை பயன்படுத்தி இருந்தனர்.
முருகன் மாநாட்டில் அண்ணாவை பயன்படுத்தியவர்கள், இந்த மாநாட்டில்
எம்.ஜி.ஆர். ஜெயலலிதாவை பயன்படுத்தியுள்ளனர். இதற்கெல்லாம் யாராவது ஒப்புதல் கொடுத்தார்களா,
அவர்களே எடுத்துக்கொள்கிறார்களா என்பது கேள்வியாக மாறியிருக்கிறது.
அதேநேரம், அதிமுக போஸ்டர்களில், எழுச்சிப்பயணங்களில் மோடிக்கு
இடம் கொடுப்பதே இல்லை. மோடி படம் போட்டால் ஓட்டு கிடைக்காது என்று தவிர்க்கிறார்கள்.
இந்த நிலையில் பாஜக மட்டும் எம்.ஜி.ஆர்., ஜெயலலிதா படங்களைப் போட்டு ஓட்டு வாங்க வேண்டுமா
என்று பாஜகவினர் கொதிக்கிறார்கள்.
